آغلاما چوخ گلمه فریاده قیزیم یافاطمه
ویرمه صبرون خرمنین باده قیزیم یافاطمه
.
.
توکمه گوزیاشون عذاره، گلمه داد و شیونه
آغلاما، بو آغلاماق جان اوسته نسگلدور منه
آغلوسان حالیم اولور آشفته باخدوقجا سنه
خاطریم نی تک گلور داده قیزیم یافاطمه
.
.
سیل گوزون یاشین بو حالیمده ملول ایتمه منی
گورمیوم بو آخِر عمریمده گوزی یاشلی سنی
گوزلرون مندنصورا چوخ آغلادار قوم دنی
گولمه سن بیرده بو دنیاده قیزیم یافاطمه
.
.
گرچه هجرانیم سنه بیر درددور مالایُطاق
صبر ایله امّا نچه گوندور بو ایّام فراق
اهل بیتیمدن گلن سنسن منه اوّل قوناق
انتظارم خلد اعلاده قیزیم یافاطمه
.
.
ایلمه زلفون پریشان، ایمدیدن یورما اوزون
یانمیوبدور درگهون، شام اولمیوبدور گوندوزون
سیلی ثانیدن اولموب نیلگون بو گل یوزون
محسنون اُلموب او اثناده قیزیم یافاطمه
.
.
نه عم اوغلون قولّاریندا وار هله بند و طناب
نه ایدوب سوز غم و محنت سنون قلبون کباب
چکمه آه آتشین اولما بیله بی صبر و تاب
وورما اود بو قلب ناشاده قیزیم یافاطمه
.
.
مُلکیوی الدن هله نه فرقۀ اشرار آلوب
نه حسینیله حسن اوچ گونلریله آج قالوب
زینب و کلثومی نه محنت هله دلدن سالوب
بو جفالر گلموب ایجاده قیزیم یافاطمه
.
.
ای بلالر آشناسی خوش گونون بیگانه سی
ایمدیدن ایتمه مبارک خاطرون غم خانه سی
گزمه سین زلفونده آخِر دست حسرت شانه سی
اولما چوخ زلفون تک افتاده قیزیم یافاطمه
.
.
اشک چشمون سیله دوندرمه عذاره باغلاما
هر قدر منده نفس وار ایتمه ناله آغلاما
آتش درد و غم و محنتله قلبون داغلاما
گلمه بیله داد و فریاده قیزیم یافاطمه
.
.
جانیوی آخِر هله غم منجنیقی سیخمیوب
باش آچوخ ثانی سنی اشرار ایچینده یخمیوب
خرد اولموبدی قابرقان آهون عرشه چخمیوب
یتمیوب غم قدّ شمشاده قیزیم یافاطمه
.
.
اهل کینه بیعت اوسته بزم شورا قورمیوب
مسجده چکموب عم اوغلوم قلبیوی یاندورمیوب
قنفذ بی دین قولوندان تازیانه وورمیوب
گیتمیوبسن مسجده داده قیزیم یافاطمه
.
.
ساخلا گوزیاشون قیزیم کرب و با صحراسینه
غرق اولار اوغلون حسین اونداکی قان دریاسینه
گل باخ آغلا گون ایوینده چاک چاک اعضاسینه
یان جفای قوم بیداده قیزیم یافاطمه
.
.
زینبین مانع اولار اهل جفا گوزیاشینه
آغلیان وقته ورالّار تازیانه باشینه
شمر دون قویماز باش آچسون آغلاسون قارداشینه
یالوارار بی رحم جلّاده قیزیم یافاطمه
.
.
معصیتده ایلیوب عاصی عزیز عمرین تلف
ایمدی بو درگاه پاکونده اولوب سائل به کف
ناامید ایتمه قاپوندان ای دُر بحر شرف
قیل شفاعت سنده عقباده قیزیم یافاطمه
.
- سه شنبه
- 30
- مهر
- 1398
- ساعت
- 16:29
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه