آقاز حسینده باخون بیر کرامت و فضله
گلنده قافله یوز دوندروب ابوالفضله
.
.
دور آچ گوزون عبّاس علمون آل اله قارداش
پیشواز ایلیون گلدی گئدن قافله قارداش
.
دولدور قورین مشکووه بو آب فراتی
قویما بالالار سوز عطشدن ئوله قارداش
.
زینب باجمون عطری گلور یاتما اویان دور
یغ لشگریوی باشوه یوز قوی چوله قارداش
.
قویما اوجالا آتلاریزون شیحه صداسی
قورخار بالالار ایلمیون هلهله قارداش
.
بیر سس گلوری الدن آلور صبر و قراری
لیلا سسیدور اکبری سسله گله قارداش
.
شیون سسی چوخ اوج ائدوری عرش برینه
اولما بو سکینمدی سزیلدر بئله قارداش
.
دور قاسمه بیر دسته قزل قرمزی گول وئر
نصب ائتسون عروسی اوتوران محمله قارداش
.
گهواره چخاردون قاباقا بلکه ربابون
لایلای سسینی قبرده اصغر بوله قارداش
.
سجّادین الیندن یاپشوب ایله پیاده
ناخوشدی بالام طاقتی یوخدور گله قارداش
.
یوخدور بو گلن قافله ده یوخسا رقیه
گلمور سسی مشتاقم او شیرین دیله قارداش
.
واردور یری گر عرض ایلسم زینب کبری
سسلندی بئله آغلاما بو نسگله قارداش
.
بیر تک سنی یاندورموری اول نازلی رقیه
آغلار قالوب احوالینه بیر سلسله قارداش
.
نسگللرینی یاده سالان وقتیده زینب
رخساره توکر اشکینی بی فاصله قارداش
.
باشون دالجا کوفه و شاماتی دولاندی
وصل رخ یاری سالا بلکه اله قارداش
.
گه دیره چکوبدور اونی اوز باشدا کی شوری
گه شامده ویرانه قالان منزله قارداش
.
صد حیف اولا مقصوده ولی اولمادی نایل
حسرت قالوب آخرده قبیله ائله قارداش
.
یاتدی سنی رویاده گوروب بیر گجه دوردی
ویرانیه آهیله سالوب ولوله قارداش
.
هر قدر دئدیم آغلاما عمّون سنه قربان
صبر ایلمدی تنگه او خوش حوصله قارداش
.
دشمن سسین آلدی بالامون وئردی تسلّی
چوخ جای تعجّبدی بو ایش عاقله قارداش
.
گوندردی بالا دردینه درمان آتا باشین
باخدی باشوا باشلادی عرض گِله قارداش
.
دردین دئدی بیر بیر سنه تا دوشدی نفسدن
سالدی گجه وقتینده سنی نسگله قارداش
.
غرق ائتدی منی بیر غمینه نازلو رقیه
اوز زورق جسمین یتوروب ساحله قارداش
.
دوشدی نظریم غسل وئرن وقتیده گوردوم
واردور ایاقیندا اثر آبله قارداش
.
اؤز کوینگیمی جسمینه من بیر کفن ائتدیم
تاپشوردوم او گول پیکری قبره ائله قارداش
.
ائتدیم بالاما گوشۀ ویرانه نی مدفن
غم باغریمی دوندردی منیم مشعله قارداش
.
قبر اوسته عزا شمعی دوزلَّر بودی رسمی
من دوزودم او شمعی شرر آهیله قارداش
.
غم چکمه که ویرانه ده تک قالدی رقیه
دشمنلریمه ثابت اولوب مسأله قارداش
.
شامه گلوری قبرینه هی دسته به دسته
بلبل کیمی اوخشالّا او شیرین دله قارداش
.
آغلا بو غمه توشه ایله قبره «رجائی»
لازمدی سنه زاد ره و راحله قارداش
.
.
- سه شنبه
- 30
- مهر
- 1398
- ساعت
- 16:43
- نوشته شده توسط
- ابوالفضل عابدی پور
ارسال دیدگاه