عالمده باجون تک غم ودرده دوزَن اولماز
زینب غمینی دهریده سنسیز بولَن اولماز
.
چوخلار چکر عالمده غم و محنت وآلام
دنیاده ولی من کیمی محنت چَکن اولماز
.
من عاشقوم سنده منیم روح و روانیم
سنله منله تای بیر باجی قارداش گورن اولماز
.
اُول گون که فراقون اوخی بو قلبیمه دَیدی
هیچ کیمسیه قارداش بیله یاره دَین اولماز
.
ظلمیله حسین سولدی سنون گلشن عشقون
قارداش بیله ظلمیله سولان بیر چمن اولماز
.
بیر سَرو کیمی اکبریوی ییخدیلا آتدان
گوردون نجه قارداش اونی سن تک گورن اولماز
.
قاسمده حسین گل کیمی بو چولده سارالدی
انصاریوین ایچره بیله گل پیرهن اولماز
.
عباس اُلومی بوکدی سنون قدّیوی قارداش
قارداش غمی تک قامتی قارداش اَگن اولماز
.
قدّون بوکولوب سیندی بئلون گیتدی قرارون
قالدون نجه حاله بیله درد و محن اولماز
.
آهو کیمی اوخلاندی علی اصغرون ایوای
سو صحبتی تک قلبی دَلن بیر سخن اولماز
.
سو ویرمدیلر سو ،یرینه قانینی ایچدی
فکر ائتدی که گویا بیله شیرین لبن اولماز
.
عالم نقدر اصغریوه آغلاسا آزدی
امّا آناسی تک اونا بیر آغلین اولماز
.
گهواره سینین دوره سینه هی دولاناردی
سسلردی منیم تک بیله کامه یِئتن اولماز
.
من التی آیین زحمتینی تحفه گتوردوم
ناچیزیدی امّا اونا عالم ثمن اولماز
.
سنده منی تک قویدون اوزون کامه یتیشدون
سن تک بویولی کیمسه حسین جان گئدن اولماز
.
سندن صورا قارداش بالالار دوشدی بلایه
عالمده بو قیزلار کیمی درده دوشن اولماز
.
باغلاندی بالا قیزلاروین قولاری قارداش
ظلمون رَسنی تک بیله محکم رسن اولماز
.
شامه آپاروبلار بیزی قول باغلی پریشان
ویران ندن آخر بیله دور زمن اولماز
.
ویرانده یئر وئردیله آل الله قارداش
ویرانیه دونسون بو جهان بس ندن اولماز
.
ویرانه غمی سالدی ایاقدان منی قارداش
چکدیم نلر آخر منِ بیکس ،بولن اولماز
.
ویرانده جان وئردی بالان نازلی رقیه
دنیاده اونون تک بولوسن جان وئرن اولماز
.
آغوشه آتا باشینی هانسی قیز آلوبدی
سویلردی بابا سن کیمی مظلوم الن اولماز
.
بیر آز دانیشیب گوزلرینی یومدی رقیه
او حالیده بولدی گوزینی باغلین اولماز
.
بیر قبر قازوب کوینگینی من کفن ائتدیم
دفن ائتدیم اونی من کیمی دفن إیلین اولماز
.
ایستردیم اوپم سیلی دَین صورتی امّا
گوردوم شرر قلبیمه بیر سو سپن اولماز
.
سالدی آنامی یادیمه چون آنینی اوپدوم
قلبی داغیدان بیله غمیله حزن اولماز
.
گلدیم بو مزار اوستنه ایمدی سنه قربان
بو بیکسه بوردان صورا آیری وطن اولماز
.
عمرون یتوری باشه #نوین یوخدی مجالون
بوندان صورا بیر فرصت اگر ایستسن اولماز
.
دوشموش باشوا کرب وبلا شوقی یوبانما
حسرتدن اورک قانه دونوب گیتمسن اولماز
.
.
- سه شنبه
- 30
- مهر
- 1398
- ساعت
- 16:51
- نوشته شده توسط
- ابوالفضل عابدی پور
- شاعر:
-
علی نوروزی (نوین)
ارسال دیدگاه