چوخ با صفادی بزم عزا اربعین گونی
قالخار سمایه شور ونوا اربعین گونی
.
دیلده فراق نوحه سی اسپهره اوج ائدر
باشه گلنده غملی هوا اربعین گونی
.
قرخ گوندی عرشه قاره چکوب ذات کبریا
نوحه اوخولا اهل سما اربعین گونی
.
شک ائتمورم نتیجه آلار حاجتی اولان
اخلاصیله گر ائتسه دعا اربعین گونی
.
هربیر مریضی دکتر اگر ایله سه جواب
گلسه تاپار بو یرده شفا اربعین گونی
.
کرب وبلایه گلدی بو گون غملی قافله
محمل لری گیوبدی قرا اربعین گونی
.
اللر ئورکده فاطمه نون شیرزن قزی
مهمان گلوبدی قارداشینا اربعین گونی
.
پیغمبرون رشیده قزی قدی خم گلوب
یاس باشلیا ئولنلره تا اربعین گونی
.
یوز قویدی اوندا قارداشینون توزلی قبرینه
گلدی بیانه ، وامحنا اربعین گونی
.
خوش گلدین ایله قارداش حسین زینبون گلوب
دور باخ قطاره یاتما شها اربعین گونی
.
سانما غریبه من باجووام یابن مرتضی
گلدیم دویونجا آغلاماقا اربعین گونی
.
خسته مسافرم گوزومی تیکمیشم سنه
وئر باری بیرده قلبه صفا اربعین گونی
.
گل بسلینلرین یولی گلزاریدن دوشوب
فرصت گوروبله اوخشامیا اربعین گونی
.
تپراقون اوستونه دوشنوبدور ستاره لر
اوغلون گزور بو یرده آنا اربعین گونی
.
لیلی گلوبدی اکبرینون طره سین گوره
بیرده او زلفه شانه ورا اربعین گونی
.
قاسم آناسی تازه عروسیله یان یانا
قاسم گزوله الده حنا اربعین گونی
.
اصغرآناسی گوز یاشی قانه دونن رباب
لایلای چالور که اوغلی یاتا اربعین گونی
.
آهولرین ملشمه سی سس قوشدی لایلایا
نفرین ائدوله اوچ پر اوخا اربعین گونی
.
وار قاعده سالالا مزار اوسته تیرمه فرش
چیخماز الیم بو یرده بوشا اربعین گونی
.
من شال وفرشه یوخدی گمانیم گذشت ائله
بیر تحفه الده گتدیم اخا اربعین گونی
.
ئوز قانلی کوینگون سررم قبرون اوستونه
هئچ شال ترمه چاتماز اونا اربعین گونی
.
(نادر)نچونکه باب کرمده دخیل اولوب
واردور امیدی مطلب آلا اربعین گونی
.
- سه شنبه
- 30
- مهر
- 1398
- ساعت
- 18:11
- نوشته شده توسط
- ابوالفضل عابدی پور
- شاعر:
-
حاج نادر بابایی
ارسال دیدگاه