یارب بو شهره قافله ی غم گتورموشم
بیر عدّه سینی هم آپاروب هم گتورموشم
.
بیر عدّه سین ولی گتوره بیلمدیم بورا
علّت اودور کی حالیمی برهم گتورموشم
.
جدّیم رسوله بیلمورم آیا نه سویلیوم
شرمنده یم کی چوخ آپاروب کم گتورموشم
.
کرب و بلا چولونده داغیلدی جلالیمیز
بیر عدّه یاسلی، دوتماقا ماتم گتورموشم
.
قارداشلاریم ئولوبدی باشا قاره سالموشام
گوزیاشیمی نشانه ی علقم گتورموشم
.
زهرا آنامه هدیه بوگون قانلی پیرهن
ام البنین آنامه ده پرچم گتورموشم
.
ئولدوردولر حسینی سوسوز کسدیلر باشین
قارداش غمینده قامتیمی خم گتورموشم
.
یانّام ربابه یوخدی قوجاقینده اصغری
لای لای یئرینه، ای وای نی `دم” گتورموشم
.
اکبر ئولندن اولدی ایشیق گون قرا گئجه
لیلا گوزینده لیله ی مُظلَم گتورموشم
.
مظلوم حسن نشانه سی قاسم ده جان وئریب
آدین اورَک یاراسینا مرهم گتورموشم
.
من بوش قالان اتاقلاری آیا نئجه گوروم؟
قلبیم دولوبدی گوزلریمی نم گتورموشم
.
ویرانه ده رقیّه قالوبدور، سکینه نی
صغرایه، آغلاماقلیقا همدم گتورموشم
.
اهل مدینه قاره گییر `یاحسین” دییر
بو شهر سبزه، رنگ محرّم گتورموشم
.
بسدور `بشیر” یازما اورک لر کباب اولور
یاز روضه ئیله نوحه نی توام گتورموشم
.
- پنج شنبه
- 2
- آبان
- 1398
- ساعت
- 10:20
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه