ائتمسیدی خلق اگر ذات خدا زهرانی
نه نبی نی یاراداردی نه علی مولانی
.
رتبه ده برتر نسوانِ ایکی عالمدی
وار کنیزی او خانم کی گتیروب عیسانی
.
سبب خلقت اولاد بشردی بو خانم
او بونون نوریدی سینایه چکیب موسانی
.
خلق ائدندن سورا خلّاق ، بشر مثلینده
آتا، شأنینده ائدیب خلق شه بطحانی
.
گوردی یوخ خادمه لایق بونا جنتده اولا
گتیروب آسیه نی بیرده خانم سارانی
.
شأنه باخ جاهینه باخ مرتبه و عزّته باخ
اولدی جبریل امین درگهینون دربانی
.
بو حسن اوغلودی صلح ایلدی دین رشد ائتسون
سربلند ایلدی تا حشره کیمی قرآنی
.
گوردی دین زنده قالار قاندی اونون لازمه سی
ایلیوب کرب و بلاده بالاسین قربانی
.
عقل حیراندی ائده درک خانم فاطمه نی
ایله بیر شخصیدی مبهوت ائلیوب دنیانی
.
بو جلالتده خانم یوخدی گلن دنیایه
مام خلقت گتیرنمز بئله بیر حورانی
.
بو خانم کفوّی فقط شیر خدا مولادی
او کی تقسیم ائده جاق جنّتیلن نیرانی
.
بو او بانودی که چادر سرینین سایه سینه
چووروب امّت موساده اولان ایمانی
.
بو او بانودی که حقّینده مقال اولدی بو سوز
بضعةٌ منّیً دیوب کل بشر سلطانی
.
بو او بانودی کی اعمادن اوزون گیزلتدی
بو حدیثون نَیه لازم دی اولا برهانی
.
بسدی شأنونده کی قرآندا بونا آیه گلوب
و هی الکوثر و نازل ائدوب اعطینانی
.
نه قدر یازدی« حسینی » بو خانم مدحینده
نه قدر وصف ائلیوب « سائل » ایله عنوانی
.
نه قدر یازدی « کلامی » بیله بیر بانودن
نه قدر« منزوی » و « انور » اولوبدور بانی
.
ایستدی « صادقی » یازسین بونی درک ائتدی فقط
نه قدر یازسا قلم یوخ سوزونون پایانی
.