گول تک نه تیز اولدون خزان آی ننه
دونیدی گردش زمان آی ننه
آیریلیق الیندن امان آی ننه
دونیدی گردش زمان آی ننه
.
.
یانام آنا بیر بلبلم چمنسیز
آناسیز قیز بیرگون اولماز محن سیز
دنیانی نیلورم بو ائوده سنسیز
وصلت گلوم اولدی خزان آی ننه
.
.
باشلادی ایمدیدن باشیم بلاسی
گولمز یوزی ، ئولسه قیزین آناسی
سن که گئتدون گئتدی ایوین صفاسی
ایو اولدی پوزقون گلستان آی ننه
.
.
بو ایوده سایه باشیمه سالاردون
محنت گونومده قیدیمه قالاردون
غمگین اولاندا گوگلومی آلاردون
اولار یوخیدیلرگمان آی ننه
.
.
اهل دل اولسا دلده چوخ سوزوم وار
عالم آنا اولسا سنده گوزوم وار
هر قدر غم یتسه منده دوزوم وار
هجرانیوه یوخدور توان آی ننه
.
.
هرکیمسه نون قبیله سی یادی وار
تک دورآنا قبیله نون آدی وار
آنانون عالمده ئوزگه دادی وار
آناسیز قیزگولر هاچان آی ننه
.
.
دیمم گلوب بو حالیمه یانیدون
محال دردیمی آسان سانیدون
الله بولورکه سن نجه آنیدون
یادیمدان چیخماسان بیرآن آی ننه
.
.
دیمم کیمسه گلوب یتسون دادیما
من زینبم غم یازیلوب آدیما
سنله گیچن گونلر دوشور یادیما
سسلینده دیردون جان آی ننه
.
.
دیمم قیزون زینب قرا بختیدور
دیمم رختیم یتیمه لیق رختیدور
هر چند عالمده ئولوم سختیدور
آیریلیق الندن امان آی ننه
.
.
یوخدی سوزوم عمرون گولی تیز سولدی
بو باره دن قلبیم غمیله دولدی
هانسی آنا گور نصف شب دفن اولدی
اولدی کیمون قبری نهان آی ننه
.
.
گرچه آنا سنسیز گونوم قارادی
بو غمیلن اورک اما یارادی
سوروشسالارآنان قبری هارادی
هایانی من ویروم نشان آی ننه
.
.
دائم گلر بوی خزان قاپوندان
حشره کیمی گیتمز نشان قاپوندان
آلّام آنا عطرون یانان قاپوندان
خراب اولیدی بو جهان آی ننه
.
.
رخت عزا بو جسمیدن سویمارام
غمونده من آغلاماقدان دویمارام
سن یخیلان یره ایاق قویمارام
او یردی حرمتلی مکان آی ننه
.
.
باران کیمی غم اوستوه یاغاردی
غملر ئوزی احوالیوه یاناردی
درد و مصیبتدن باشون آغاردی
غمدن قدون اولدی کمان آی ننه
.
.
ایلر منی افسرده دل ملالون
بولّم اله دوشمز داخی وصالون
گل یوخوما هر دم گوروم جمالون
هجره دوزمرم اینان آی ننه
.
.
گللر سولارگورسه رخ زردیمی
باتار غمه گورن آه سردیمی
سندن صورا کیمه دیوم دردیمی
کیم ایلر دردیمه درمان آی ننه
.
.
ایلر اثرآغلارگوزوم حسینه
خدای حق ویرر دوزوم حسینه
آنالیق ایلرم ئوزوم حسینه
قالما حسیندن نگران آی ننه
.
.
گتورلّه قبر اوسته گول بیر دسته
یوخدور گولوم نیلیوم من دلخسته
شب جمعه گلنده قبرون اوسته
دلده گتورم غنچه قان آی ننه
.
.
دین اوسته هررنگ و غمه بویانام
گل تک جهاندا خاره دالدالانام
بشگون آنا یامان درده دایانام
گیچوب گیدر یاخشی یامان آی ننه
.
.
سنکیمی بیر مظلوم ئولن اولمادی
نه دردیلن ئولدون بولن اولمادی
دوتدوم عزا یاسه گلن اولمادی
بو غم ائتدی باغریمی قان آی ننه
.
.
سنیدون عالمین آنا طبیبی
ای خوش گونون عالمده بی نصیبی
اولدون وطنونده وطن غریبی
حالیوه اولمادی یانان آی ننه
.
.
جان ویرینجه آخدی یوزه گوز یاشون
او قدری غم چکدون آغاردی باشون
کیم آغلاسون نه باجون نه قارداشون
ئوزوم اولّام سنه گریان آی ننه
.