امّ البنین مادر عباس نامدار
جان اوسته کربلایه باخار ایلر آه زار
.
سسلر رشید اوغلی ابوالفضلی دادینه
سویلر گل ای اوغول آناوی قویما انتظار
.
دورد اوغلومون اوغول چکورم انتظارینی
جان اوسته انتظار آناوون صبر ایوین یخار
.
دورد نامدار اوغول آناسیدیم عزیزیدیم
پوزدی عجب جلالیمی بو دور روزگار
.
قارداشلاریوی باشووه یغ باوفا اوغول
زینب حضورینه اولون عباس رهسپار
.
دی فاطمه کنیزه سی ام البنین اُلور
گلسون گوزومی باغلاسون اول معدن وقار
.
بیر عمر آل عصمته من اولموشام کنیز
اولسون بو سخت وقته منه یار و غمگسار
.
گوگلوم قوشی اوچاردی همیشه بو عشقیله
تابوتیمی من اُلسم حسین چینینه آلار
.
برعکس ایلیوب ولی آمالیمی فلک
اَلدن آلوب حسینیمی بو چرخ کجمدار
.
باخ بیر قضانین امرینه گور نیلدی قدر
روح آیریلاندا جسمه نقدری اولور فشار
.
گیتدی صفای شهر مدینه حسینیله
یخدی فلک منیم ایویمی ایتدی تارمار
.
گوندوزلر ایوده اگلشم امکانی اولمادی
اولدی حسین سیز گوزومه خانه تیره تار
.
گیتدیم بقیعده گونلر ایوینده شکسته حال
توپراقلار اوسته چکدیم اوغول شکل دورت مزار
.
من اوخشادوقجا اوغلون اوغول گلدی نالیه
عبداللهی سیزیلتیلاریم ایتدی اشگبار
.
گونلر ایوینده منده بالاندا یانوب سولوب
واضحدی گون ایوینده قالا غنچه گل، سولار
.
از بس یانخلی نوحه لریم جانگدازیدی
یاندی شکسته حالیمه مروان نابکار
.
آخشام گلنده منزله یورقون هما کیمی
بیر آیری غملر ایتدی منی محنته دچار
.
گوردوم بو دل شکسته بالان خسته اگلشوب
مندن سنون سراغووی هر لحظه ده دوتار
.
آلدیم قوجاقیمه کی اوپم غنچه لبلرین
سرگرم ایدم، بو فکری گورم باشیدن آتار
.
بیر خردا مشگ ویردیم اوغول سالدی چینینه
سقانین اوغلی چینینه سو مشگینی سالار
.
بیر سبز علمده ویردیم اوغول آلدی دوشینه
بو منظره یقین دل دنیانی یاندیرار
.
یالقیز بو ایوده اولماقیمون فکرین ایتمورم
فکریم بودور کی یالقیز اوغول بو بالان قالار
.
بسدور بو افتخار منه ممکن اولسا گر
اوغلوم حسن یانندا بقیعده قیل همجوار
.
حسرتله ال اورکده خانم یومدی گوزلرین
دار بقایه امّ بنین اولدی رهسپار
.
عزتله دفن و کفن ایتدی اوزی فخر ساجدین
قویدی مزاره غملر آناسین او گلعذار
.
گویا بویوردی یات آنا غملر یوروب سنی
باغ بهشتیدی سنه بو غصه لی مزار
.
سن دورت شهید اوغول آناسیدون بو دهرده
غبظه ایدر جلالتوه مام روزگار
.
کرببلاده اوغلون ابوالفضل باوفا
اسرار عشق و عاطفه نی ایتدی آشکار
.
نهر فرآتی آلدی سوسوز چخدی نهردن
ووردی شرار قلبی دل عالمه شرار
.
سن ریزه خوار خوان حسین اولموسان ((پرند))
بو ریزه خوار اولماقووا ایله افتخار
.