آنا زهرا وطنیمدن نگران آیریلورام
قلبیمی تنگه سالوب جبر زمان آیریلورام
.
.
جَلوتون چکدی منی خوابگهِ خلوتیوه
گلمشم بو دل شب دایرۀ رحمتیوه
بُلورم بیرده الیم چاتمیاجاق تربتیوه
یتیشوب اوغلون حسینون آنا بُن بَسته ایشی
قبروون اوسته اولار بو گلیش آخر گلیشی
.
.
مندن ای الده ئولن ضربه لی پهلویه سلام
قبره تل تل توکولن تِللره گیسویه سلام
قان دولان گوزلَریوه سیلی دَگَن رویه سلام
جوّ جنّاتی پریشان دولانان روحه سلام
لحد آلتیندا قالان سینۀ مجروحه سلام
.
.
بیر گیجه مرقد طاهایه یتوردوم اؤزومی
قبری بیتوته ایدوب شرح ایلدیم هر سؤزومی
یوزومی قبرینه قویدوم یوخی دوتدی گؤزومی
یوخوما گلدی بابام بوینوما سالدی قولونی
آلنمی ئوپدی نشان ویردی شهادت یولونی
.
.
آلمیشام نهضته برنامه می من گئتملیم
چاره یوخدور ایلیوب ترک وطن گئتملیم
قبریوه قونشی اولا بسدی حسن گئتملیم
هر شکوفا گُل آنا صحن گُلُستاندا سولار
تک سنون سینه گلون قانلی بیاباندا سولار
.
.
زادۀ هند ویروب قشری شیوخه زر ناب
چالشور خوار اولا جدّیم گتورون زنده کتاب
شرعی تکلیفدی اوغلون ایده نهضتده شتاب
ساخلارام قلۀ اعلاده الف لام علمین
قویماران تا نفسیم وار یاتا اسلام علمین
.
.
من سکوت ایتسم اگر دشمن دین کامه چاتار
طُلقا زاده فساد ایلیوب آسوده یاتار
آستانونده ئولن محسنوین قانی باتار
ایستورم قان آخا شیرازه لیه تاریخی
تازه مولود نوه ن تازه لیه تاریخی
.
.
آسمان وطنی دود غم ایلوب پَلمه
قالانیم ایوده خلاصه ایدورم بر کَلمه
بر علیله بالادور بیر قوجا امّ سَلمه
آپارا بُلمورم افسوس ایکی محنت دچارین
تاپشورام قبریوه بی صاحب ایوین من آچارین
.
.
یولداشیمدور بو سفرده هامی اهل حرمیم
هاشمی طایفه سی دوره ده خیل خدمیم
یول اوزاقدی ولی زینبده گیدور یوخدی غمیم
باشنا عترتیمون سایه سی رحمت تاجی دی
ایوین آباد منه هم آنادی هم باجی دی
.
.
سفره یاخشی تدارک ایلیوب یوخسا فلک
بو سوزون اوستون حسینون هله آچمیدی گرک
توخوموشدون اؤز الونله منیچون بیر کوینک
آپارور بوقچادا ارثیه او پیراهنی ده
ساق اولیدون آنا ایکاش آپاریدوم سنی ده
.
.
من گین وقته او پیراهنی هنگام خطر
خیمه لرده خوش اولاردی اوزون اولسیدون اگر
ملر آهو کیمی قزلار قالان وقته ملر
ائشیدردون باجیمون غش ایلین وقته سوزون
دیزلرون اوسته آلوب باشین آیلداردون اوزون
.
✔️ جواب حضرت زهرا سلام الله علیها
.
ایشیدنده بو سوزی کرب و بلا نوحیندن
آنا یاندی بالانون محنت مشروحیندن
گوئیا سس اوجالوب فاطمه نون روحیندن
تربت قبریمه قویما باتا گوز قاشووی سل
کپریگوندن یوزووه جاری اولان یاشووی سل
.
.
تانیمور گیزلین اولان قبریمی اهل وطنیم
دوشوسن چوللره یثربده کیمیم واردی منیم
نیمه شب لر سنیدون قبریمون اوسته گلنیم
آناوین ساغر آمالی حسین دولمیاجاق
ایوای ایوای منه بیر فاتحه خوان اولمیاجاق
.
.
گورمدون یثربی ایمنده گئدورسن بُلورم
مکّیه فکری پراکنده گئدورسن بُلورم
حرم امنه پناهنده گئدورسن بُلورم
عشقیله مُحرم اولارسان حرم اقدسه سن
ممکن اولماز ولی قربان گونی قربان کسه سن
.