نازیله یاتما آچ گوزون
پیغمبرین ریحانه سی
شمع جمالون قوی اولا
جان علی پروانه سی
.
.
آچ گوزلرون گور غصه دن اشکیمده که طوفانی سن
آخر سپهر رافتین سن بیر مه تابانی سن
شیرین دلون قربانیم دیندیر من نالانی سن
شاید شکسته گوگلومون تعمیر اولا ویرانه سی
.
.
ای ذات حق محبوبه سی وی دختر ختمی مآب
ناز ایلوسن سس ویرموسن یا نطقدن مانعدی خواب
دور گور باشون استه نجه آغلور عم اوغلون بوتراب
هاردا بیله بی میل اولار جانانه ئوز جانانه سی
.
.
باد جفای خاریله سولموش جمالون گل کیمی
افشان اولوب زلفون یوزه بیر دسته ی سنبل کیمی
باخدوقجا بو گل سنبله گلم دله بلبل کیمی
شور و نوائیله دولار بو درد و غم کاشانه سی
.
.
چون آیریلیق هنگامیدور لازمدی اولسون کشف حال
مرضیه سندن راضیم حقیم سنه اولسون حلال
اما منی چوخ آغلادور قالسا اورکده بو ملال
سنده حلال ایله منی ای بحر غم دردانه سی
.
.
معلوم اولور بو حالدن قرب وصاله چاتموسان
بیر تک نه من، گویا هامی دنیانی گوزدن آتموسان
قربان بو آغلار گوزلره زهرا نه راحت یاتموسان
گویا سنی مدهوش ایدوب بزم وفا پیمانه سی
.
.
مولا یتوردی بو یره تا ئوز یانقلی سوزلرین
آلدی سسین محبوبه سی نازیله آچدی گوزلرین
آغلار گوزیله ایتدیلر محو تماشا ئوزلرین
بو پر اسف وضعیتین روحیم اولور دیوانه سی
.
.
زهرا علینین تا گوروب درد و ملال و فاشینی
دولدوردی آه و زاریله ئوز چشم گوهر پاشینی
قهرا آپاردی بیر الین سیلدی اونون گوز یاشینی
آغلار او حاله عالمین هر عاقل و فرزانه سی
.
.
اشکیله یم تشکیل ایدوب دریای محنت نوحینه
تصمیم آلوب راحت ویره منصوره یورقون روحینه
چکدی علینون گوز یاشین ئوز سینه ی مجروحینه
عرض ایتدی درده آشنا اولماز علی بیگانه سی
.
.
مظلومین اشکی چوخ ویرور هر بیر سنق قلبه صفا
سن تک هانی مظلوم اولان ای شهریار ماسوا
وار بیرده هاردا من کیمی درد و بلایه مبتلا
قوی بو سنق قلبین اولا بو گوز یاشی هم خانه سی
.
.
بو نقصدور آئینیمه گر من دیسم الله سن
دشمن ولیکن سندیروب بو قلبیمی آگاه سن
آل بو شکسته گوگلمی آخر ولی الله سن
هر خانه نی تعمیر ایده لازمدی صاحب خانه سی
.
.
دشمن او گون که ظلمیله اود ووردی باب رحمته
الله بولور نه نوعیله دوشدوم فشار و زحمته
سسلندی دی یا فاطمه گلسون عم اوغلون بیعته
وار جان قولاقیمده هنوز اول نعره ی مستانه سی
.
.
هر چند چوخ آزرده سن بو شور شینیمدن منیم
اما گوتورمه گوز ایکی نور و دو عینیمدن منیم
روحیم حسندن روحدن آرتوق حسینمدن منیم
بیر عمر اولوب زهرا ایکی شمع وفا پروانه سی
.
.
بیر گون گلر اجرا اولار امر مقدر کوفه ده
گفتاریوی یاده سالار زهرایه مظهر کوفه ده
مین شوریله برپا ایدر بیر شور محشر کوفه ده
کیمدور دیه للر بو خانم، وار شیوه ی مردانه سی
.
.
مندن صورا بیر نوعیله سرگرم اولار زینب قیزیم
گه کوفه ده، گه شامده، دینه آچار مکتب قیزیم
ویرانه یرده هر گئجه قیلسا نماز شب قیزیم
زلف غبار آلود اولار اوز سبحه ی صد دانه سی
.
.
خوندل نه عالمدور گنه عاجز قلم، اعجاز ایدور
یوخ یوخ او مولا لطفیدور آثاریوی ممتاز ایدر
بی شک فقیر عشق اولان مین شهریاره ناز ایدر
وار خانقاه عزلتین تشریف درویشانه سی
.
.
- پنج شنبه
- 1
- اسفند
- 1398
- ساعت
- 11:43
- نوشته شده توسط
- ابوالفضل عابدی پور
- شاعر:
-
حاج حیدر خوندل
ارسال دیدگاه