گنه ماه رجب یعنی بهار مومنان گلدی
بهاری که خزان گورمز، بهار بی خزان گلدی
.
گلوب دریای رحمت جوشه بو آیدا خبردار اول
بشارت اهل ایمانه که هنگام امان گلدی
.
عبادت اهلینه ماه رجب بیر یاخشی فرصت دور
بویوک بیر هدیه دور بو امته حق دن اینان گلدی
.
رجب بیر نهردور جنت ده ، سوت دن آغ ، شیرین بالدان
روایت دور دئمه بو سوز منه بیر آز گران گلدی
.
سراسر فیض و رحمت دور بیزه بو ماه نورانی
صفادن یئر یوزی چشم محبانه جنان گلدی
.
شرافت آرتیروب بو ماه عشقه بیر نچه مولود
دیوم هم آدلارین هم گونلرین بیل که هاچان گلدی
.
قدم قویدی جهانه اولین گون حضرت باقر
حسینیله حسن اولادینه آرام جان گلدی
.
ایشیقلاندیردی بو ظلمت دوتان دنیانی نوریلن
او خورشید هدایت زینت هفت آسمان گلدی
.
او نیمجی گونده دنیایه گلوب ابن الرضا یاران
جواد آل احمد گون کیمین پرتو فشان گلدی
.
باخاندا اوغلوناشمس الشموسین قلبی دینجلدی
شماتت لردن آسوده امام مهربان گلدی
.
علی دیگری الله حسینه وئردی بو آیدا
ربابون افتخاری اصغر غنچه دهن گلدی
.
اولوب باب الحوائج آلتی آیلیقدا او مهپاره
اونا حق جانبیندن بو مقام جاودان گلدی
.
سنونده وار اگر دردون بیان ائت ایلیر درمان
گوزل درگاهینه حاجاته شاهان جهان گلدی
.
جلال و جاهیله بیت اللهه اوچ گون کعبه ده مهمان
اونیله افتخاره بیت حی لامکان گلدی
.
نجه مهماندی که کعبه اونی ایلوبدی استقبال
آچوب آغوشینی تا که قوناقی شادمان گلدی
.
او مهمان ، فاطمه بنت اسد دور مادر حیدر
او بانوی مطهردور که پاکیزه روان گلدی
.
گتوردی کعبه ده اوز اوغلونی دنیایه اول خاتون
همای رحمته بیت الهی آشیان گلدی
.
او مولودین آدین قویدی علی خلاق بی همتا
منم اعلی بویوردی حق ، علی مندن نشان گلدی
.
الا ای ذوالفنون ایندی چیخارتما مبعثی یاددان
او عید اعظمی که مخفر اسلامیان گلدی
.
همین ماه رجب ده ییرمی یدیمجی گونی یاد ائت
حضور احمد مختاره پیک حق عیان گلدی
.
رسالت امرینی ابلاغ ائدوب طاهایه جبرائیل
او گوندن جهل و ظلمت گئتدی دنیا گلستان گلدی
.
.
- سه شنبه
- 27
- اسفند
- 1398
- ساعت
- 22:27
- نوشته شده توسط
- ابوالفضل عابدی پور
- شاعر:
-
محمدرضا رمضانی
ارسال دیدگاه