ای قلم سعی ایله هرگز حقّی انکار ایلمه
اولدی کیم حقّین طرفداری اونی خوار ایلمه
.
طرز رفتارونده بدبین اولما دایم صادق اُول
ممکن اولسا خدمت ایله خلقه آزار ایلمه
.
تا توانون واردی خدمت ایله انسانیته
یوخدی گر آرامشی مخلوقه دشوار ایلمه
.
چوخ مواظب اُول کی هرگزسالما شورش عالمه
سعی ائله صلح اهلی اُول خلقی گرفتارایلمه
.
بیرکسین دنیاده گوزله سالماکسبین مشکله
یاری ائت همواره امکان اولسا اجبار ایلمه
.
منحرف ائتمه طریق حقّدن انسانلاری
دعوت ایله حقّه ساری یوخسا بیزار ایلمه
.
یاخچی انسانلار ایچینده سالما ایدل تفرقه
عاقل اُول شیطانی انساندان طلبکار ایلمه
.
ویرما تهمت کیمسیه هرگز جهاندا ای بشر
قورخ عذاب ناریدن حقّیله پیکارایلمه
.
گئت همیشه حرمت ایله خالقین مخلوقینه
اولماسا مایل بیری سن چوخدا اصرار ایلمه
.
سعی ائله الدن یاپوش ال دوتماق اللهدان قالوب
هرکیمون دوتدون الیندن تئز اونی خوار ایلمه
.
سالما بیخود بوجهاندا نانجیب افراده اوز
دقّت ایله ائتدیگون رفتاری تکرار ایلمه
.
اولسا امکانون یاپوش الدن ولیکن اولماسا
گل یالاننان کیمسه نی اصلاً امیدوار ایلمه
.
انتظاریم واردی سننده قلم تیموری تک
سنده گئت سعی ایله هرگز حقّی انکارایلمه
.
- سه شنبه
- 27
- اسفند
- 1398
- ساعت
- 22:28
- نوشته شده توسط
- ابوالفضل عابدی پور
- شاعر:
-
علی تیموری
ارسال دیدگاه