خوشا اونلار کی حق اوسته بیوک بیر امتحان وئردی
شهامت عرصه سینده عالمه عشقین نشان وئردی
.
.
اولار کی اختیار قله فتح و ظفر قیلدی
شرفلی توپراغیندان دائما رفع خطر قیلدی
مقام امتحاندا سینه سین محکم سپر قیلدی
علی اکبر کیمی اوخلاره جسمینده مکان وئردی
.
.
دفاع ائتسین وطندن باغلاییب یکسر صف عاشقلر
اولوبلار یاور دین حامی مستضعف عاشقلر
قوشولدو کاروان عشقه چوخ جان بر کف عاشقلر
گئدیب خط مقدمده صف اوّلده سان وئردی
.
.
اولار ثابت قدم اولدو شهادت شاهراهینده
رشادت گوستریبلر تک تکی اسلام سپاهینده
کسایی باکری گور نه شهامت عرصه گاهینده
یاراتدی بیر حماسه کل دنیایه تکان وئردی
.
.
بو حق عاشقلری جاندان گئچیب تا یئتدی آماله
سئچیبلر حقی باطلدن چاتیبلار عالی اجلاله
شهیدلر قانینین هر قطره سیندن نئچه مین لاله
بوی آتدی ملک ایرانه بهار جاودان وئردی
.
.
اولار صدّامیانین شهد شیرینین ائدیبلر زهر
تیکیب لر گوز او دنیایه بو دنیادن ائدیب لر قهر
اولاردان گوج آلیب ایران اولوب آزاد خرم شهر
او گون اوچ مین اسیر بعثیه اونلار امان وئردی
.
.
بو حق عاشقلری جام شهادت نوش جان ائتدی
فنادن ال اوزوب ترک سر و جان و جهان ائتدی
بقا مولکونده کسب امتیاز جاودان ائتدی
مقام قربده اجرین خدا لامکان وئردی
.
.
بولار آب حیات عشقیده تک تک وضو آلدی
رموز عشقی عشقین مکتبیندن مو به مو آلدی
شهید باش وئردی وجهینده بیوک بیر آبرو آلدی
بوی آتسین سرو حریت نهال دینه قان وئردی
.
.
جلالتله شهیدانین هر ایل واجبدی تجلیلی
بجادور هر محافلده شهیدن اولسا تمثیلی
او گون که فتنه لر قوپدی یاراندی جنگ تحمیلی
اولار هر تک تکی فتحه امید بی کران وئردی
.
.
شهادت کلمه سین شاعر یازیب یوخ جای تشبیهه
شهیدلر باش اییب حقه اولوبلار عازم جبهه
حدیث معتبر واردور بونا یوخ #قنبری شبهه
همیشه زنده دور ئولمز او کی حق اوسته جان وئردی
- سه شنبه
- 27
- اسفند
- 1398
- ساعت
- 22:34
- نوشته شده توسط
- ابوالفضل عابدی پور
- شاعر:
-
اکبر قنبری تیکمه داش
ارسال دیدگاه