نفس دوشوبدى بنده گل اوغول رضا اوغول رضا
اجل گلوبدى سنده گل اوغول رضا اوغول رضا
.
.
من اون بير ايلدى دوشمشم بو دوستاقا او دوستاقا
وئروبله زهر مهلكى توان يوخومدى دورماقا
اورك يانور جگر يانور گوزوم باخور صولا صاقا
يوبانما چوخ وطنده گل اوغول رضا اوغول رضا
.
.
.
بير عمريدور نوازشى شكنجهلردن آلمشام
سياه چاهلر گزوب رطوبى يرده قالمشام
مدينهدن چخاندا من جوانيديم قوجالمشام
رمق يوخومدى تَنده گل اوغول رضا اوغول رضا
.
.
.
آغارتمشام محاسنى مصائب زمانهدن
قفسده ائتمورم گله نه آبدن نه دانهدن
وروبدى سِند چوخ منى جفاى تازيانهدن
نشانه وار بدنده گل اوغول رضا اوغول رضا
.
.
.
بو غملى محبسيمده وار نه پنجره نه روزنه
نه گلموسن عيادته نه كاغذون گلوب منه
بو اون بير ايلده زحمتيم منيم كه اولميوب سنه
واراَجرى جان وئرنده گل اوغول رضا اوغول رضا
.
.
.
قوجا آتانى يوخلاماق صوابدور صواب ائله
باشيمى آل ديز اوستونه ئوزوى فيضياب ائله
عزا گونومدى قاره گِی گوزون ياشين گلاب ائله
اَلونده بير كفنده گل اوغول رضا اوغول رضا
.
.
.
قاريشسا زهر اگر قانا اوركده توختاماز يارا
آغيزدان آز قالور گَله جگرلريم پارا پارا
چخاندا خانمانيدن مسافرم دئمه هارا
خصوصىسن گلنده گل اوغول رضا اوغول رضا
.
.
.
آتا اوغول دوداقينى بو رسمدور ئوپر بالا
آتون ئوپه دوداقلارون محال اَمر كام آلا
منيم دوداقلاريم آجى سنون كه اوخشيور بالا
ئوپنمرم ئولنده گل اوغول رضا اوغول رضا
.
.
.
خداخدا دِيور گوگول تلاش ائدور لقا تاپا
نه زندگانى ايستيور نه ميلى وار شفا تاپا
جهان اگر طبيب اولا محاليدور دوا تاپا
بو پير دردمنده گل اوغول رضا اوغول رضا
.
.
.
نه بيلدى وردى قالب جفايه قاتل دنى
اياقلاريمدان آچمادى ئولن زماندا كُندهنى
يخوبدى تيره محبسه يارالى شير تك منى
آتون دوشوب كمنده گل اوغول رضا اوغول رضا
.
.
.
بير عمريدور وصالوزون اولوب بو يالقوز حسرتى
آتون كيمى زمانهده هانى اوغول، قز حسرتى
گونوزلرى گون حسرتى گئجه آى اولدوز حسرتى
نه گل گوروب چمنده گل اوغول رضا اوغول رضا
- پنج شنبه
- 29
- اسفند
- 1398
- ساعت
- 14:10
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه