اوندا که مسموم اولوب موسی ابن جعفر زهریله
ائتدی فرمایش مسیّب خادمه بو نحویله (1)
.
.
ای مسیّب ئولدورور هارون منی تزویریله
نعشیمی قبره قویون بوینومدا کی زنجیریله (2)
.
.
قلبیمه بو زهر کینه ایلدی تأثیر ائله
رشتۀ عمریم منیم باغلاندی بیر نازک تِئله
آچمیون زنجیری بوینومدا قویون قالسون بئله
حلقه و زنجیر خوشدور دائم اولسا شیریله
.
.
گر چه مدرکدور جفایه جسم مجروحیم منیم
بو وصیّتدن واریمدور آیری منظوریم منیم
اهل حشره کشف اولونسون سرّ مستوریم منیم
هر نه رفتار ایلیوبلر بیر مریض پیریله
.
.
خوش دوتوب هارون جفاسینده ائدن تدبیرینی
بولمه دی روحیمده زنجیر ستم تأثیرینی
یاده سالدوقجا قیامت حبسنون زنجیرینی
حقدن استغفار ائدردیم نالۀ شبگیریله
.
.
باغلانور محشر گونینده مجرمه راه گریز
مالکان دوزخه فرمان وئرور حیّ عزیز
باغلیون یتمیش ذراع اوتدان اولان زنجیره سیز
هر گنهکاری که عمرین قورتاروب تقصیریله
.
.
ای مسیّب بیر بوگون زنداندا مهمانم سنه
حیّ داوردن گلوبدور مژدۀ دعوت منه
ایلمه غصّه خلاص اولدوم یتیشدیم ایمنه
نچّه ایل محبوسیدیم من گردش تقدیریله
.
.
سعی ائدیر هارون بیچیلسون حقّه باطلدن لباس
خلق ایچینده تاپماسون بو ایشلری پیس انعکاس
خالقیندن قورخمین مخلوقدن ایلر هراس؟
گور هوای نفسی نیلور مرد دنیا گیریله
.
.
امر هارونیله تشییعیمده چوخ تعجیل اولار
سربسر بغداد شهرینده او گون تعطیل اولار
مجلس ماتم منه درباریده تشکیل اولار
تا که رفع تهمت اولسون بلکه بو تدبیریله
.
.
ای مسیّب گر چه من ئولّم غریب و بی وطن
آغلاما گر آغلاسون جدّیم حسینه آغلا سَن
اوچ گئجه گوندوز قالوبدور یرده بی غسل و کفن
قطعه قطعه دوغرانان پیکر دمِ شمشیریله
.
.
کربلادن کوچ ائدن گونده قطار زینبی
قتلگهدن سالدی دشمنلر گذار زینبی
آلدیلار الدن قرار و اختیار زینبی
گوردی قارداش قلبینی یاره سه شعبه تیریله
.
.
سؤیلدی قارداش عجب اولدوخ وطن آواره سی
پیکرون مستور ائدوب شمشیر و خنجر یاره سی
کاش قلبیمده اولیدی قلبیوون اوخ یاره سی
عازمم شاماته گور نه روحسیز تصویریله
.
.
نه روادور گلستان دینده کی گوللر سولا
اهل بیت مصطفانی باغلیوبلار قول قولا
کوچ ائدیر شامه قطار غم ، بیزی دور سال یولا
وئر اذان بو نحر اولان حُلقومدن تکبیریله
.
.
«کهنموئی» ائت عمل آرتورما قیل و قالیوه
خلق ناظردور باخولّار دوره دَن اعمالیوه
ایله تقوا تابع اولسونلار سنون امثالیوه
جور گلمز دین ریا و حیله و تزویریله
.
(1) مسیّب بن زهیر : از کارگزاران حکومت بنی عباس به شمار می رفت. از شیعیان مخلص بود که به ظاهر در سمت جانشینی سندی بن شاهک، به فرماندهی نیروهای نظامی هارون منصوب شده بود و زندانبان امام موسی ابن جعفر (ع) بود.
(2) در روایتی نقل شده که امام کاظم (ع) وصیت کرد او را با همان زنجیرهائی که در زندان به وسیله آنها شکنجه می شد دفن کنند. (منتخب التواریخ ص517.)
- پنج شنبه
- 29
- اسفند
- 1398
- ساعت
- 14:34
- نوشته شده توسط
- ابوالفضل عابدی پور
- شاعر:
-
مرحوم سیّد حسین کهنمویی
ارسال دیدگاه