غریب اُلنده گلور نالیه گوی اهلی تمام
خصوصاً اَزهد مخلوقات اولا جهاندا اِمام
.
غریب چوخلار اُلوبدور بو دار دنیاده
ولیک هیچ بیری چاتماز غریب بغداده
.
جهاندا هانسی غریب ستمکش و مضطر
عزیز فاطمه موسی بن جعفره بنزر؟
.
گورونمیوبدی گورونمز بو کون و امکاندار
غریب امام اُله زنجیره باغلو زنداندا
.
ندندی اولمادی ویران بو عالم امکان
گلوب تلاطمه دریالر ایتمدی طغیان
.
توکولمدی یره گوگلر، داغیلمادی افلاک
گلوب تزلزله خسف ایتمدی اُوز اهلینی خاک
.
او کس که گلشن توحیده بیر قزل گُلدی
وطندن اِئلدن اوزاق حبسخانه ده اُلدی
.
ندندی یُولّامادی کردگار بی همتا
او حبس خانیه معصومه شکلده حوراء
.
گلوب امامین آلیدی باشین دیزی اوسته
دییدی ای گوزی یولّاردا جان ویرن خسته
.
قیزون گلوبدی آز اشگون یوزه روان ایله
بو صون نفسده گوز آچ دردوی بیان ایله
.
بیر اوزگه نسگیلی واردور غریب بغدادین
دیولسه شیعه نین اودلار عُروق و اکبادین
.
نقدر مُجرم اولا بیر نفر بو دنیاده
که سالمیا اونی زنداندا بیر نفر یاده
.
همینکه اُلدی ندیده دوتالّا تقصیرین
ایده لّله قیددن آزاد آچالّا زنجیرین
.
امامی ایتمدیلر قید ظلمدن آزاد
خراب اولیدی گوروم کاش عالم ایجاد
.
بو یازدیقیم خبره ایستسوز اگر مدرک
یرین نشان ویرورم من او سیز او مستدرک
.
دوشن تفکّره باب وصیّته باخسون
اونوندا من کیمی خونِ دلی یوزه آخسون
.
ز بسکه قیدیله دوتموشدی شاهدین الفت
ویرنده جان اودی ایتدی وصیّت اول حضرت
.
بو بیکسه ایله بیر ظلم، ایلیوب هارون
که گورمیوبدی نظیرین بو گنبد وارون
.
جزاده شاهد اولا من دوام ایدن جبره
قویون اُلنده بو زنجیریله منی قبره
.
گلنده حشره ایاقیمده اولسا بو زنجیر
بوتون قیامتین اوضاعینه ویرر تغییر
.
فشار قید جفادن چکنده من فریاد
اولار محبّ لریم قید قهردن آزاد
.
زمین حشره بو قیدیله ولوله سالّام
من بو حاله سالانلاردان انتقام آلّام
.
اوگونکه مهدی موعود اولوب عیان گله جاق
اورکلره سو سَپَن انتقام آلان گله جاق
.
خزان دهر دونوب تازه نو بهار اولاجاق
هامی ستمگر ایدن ظلم آشکار اولاجاق
.
او گلمیوب نقدر شیعه لر گَلَر داده
حسینه گاه یانار گه غریب بغداده
.
ایدوبله قیدیله باب الحوائجی مدفون
حسین اولوبدی ولی کربلاده غرقه بخون
.
ائمه نین هره سین بیر ستمگر بیدین
فشار ظمله سالوب قانه دوندروب اوره گین
.
سالوبدی محبسه هارون غریب بغدادی
یزید شامه چکوب دست بسته سجّادی
.
اولیدی کاش نه زنجیر آدی بو دنیاده
نه ظلمیله ورولیدی امام سجّاده
.
امام عصری او زنجیر آدی ایدر دلگیر
دلیمده یوخدی توانا دیون نجه زنجیر
.
او کس که عالم امکانه نور لامعه دُر
وجودینه وورولان غُلّ غُلّ جامعه دُر
.
نقدر فیض آپارار خلق نور لامعه دن
امام او قدر چکوب رنج غُلّ جامعه دن
.
«حسینی» آغلاسا هر کیم امام سجاده
ورولماز اول کسه زنجیر دار عُقباده
.
ولی اماندی ایله ایلمه بوتون شُفَعاء
باخوب جریدوه اولسونلا حشرده خُصَماء
.
- پنج شنبه
- 29
- اسفند
- 1398
- ساعت
- 22:45
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه