بیر نظر قیل محبس بغداده یا صاحب زمان
جدّیوین حالین گوروب گل داده یا صاحب زمان
.
.
اون بیر ایل زنداندا قالدی پراسف احوالیله
مونس اولدی کنده و زنجیر و اشک آلیله
چخدی زنداندان وجودی دورت نفر حمّالیله
آغلاروق بو محنت عظماده یا صاحب زمان
.
.
نردبان اوسته گوروب نعشین سلیمان خوار و زار
واغریبا سسلنوب گوزیاشینی ایتدی نثار
آلدی نعشین، غسل ویردی، ایتدی کسب افتخار
ایتدی پر قیمت کفن آماده یا صاحب زمان
.
.
امر ایدوب اهل حرم آلدی آرایه نعشینی
وا اماما سسلنوب، آچدی خانملار باشینی
زفلرین افشان ایدوبلر توکدولر گوزیاشینی
سنده گلدون عالم معناده یا صاحب زمان
.
.
جان ویروب موسی ابن جعفر گرچه چوخ تحقیریله
اولدی بیر مدّت مصاحب کنده و زنجیریله
نازنین جسمی ولی دوغرانمادی شمشیریله
سو دیوب یالوارمادی جلّاده یا صاحب زمان
.
.
وار یری شیعه بو غمده قلبیدن قان آغلاسون
اولمادی بیر کس اُلنده گوزلرینی باغلاسون
باشینی آلسون دیز اوسته بیرجه سینه داغلاسون
دوشدی بیر اوزگه مصیبت یاده یا صاحب زمان
.
.
گرچه مظلوم اُلدی امّا ویرمدی لب تشنه جان
وورمادی باشین جدایه خولی و شمر و سَنان
قالمادی مطبخ سراده قانلی باشی میهمان
اهل بیتی گزمدی صحراده یا صاحب زمان
.
.
هیچ کسه بو ظلمی دشمن ایتمیوب ایتمز یقین
قلب زهرادن بو نسگل گیتمیوب گیتمز یقین
سینه ده اکبر یاراسی بیتمیوب بیتمز یقین
قویدی بیر حسرت دل لیلاده یا صاحب زمان
.
.
کربلا اوضاعی زهرادن آلوب صبر و قرار
آه او ساعتدن گلوب مطبخ سرایه اشکبار
اوز گُلین گوردی کول اوسه، شوره گلدی چون هزار
قالمادی طاقت داخی زهراده یا صاحب زمان
.
.
بیر اوغول وای سسلدی توکدی یوزه اشک تری
سینیه باسدی فغانیله او راس انوری
پاک ایدوب مه صورتیندن توده ی خاکستری
سالدی جنبش عالم ایجاده یا صاحب زمان
.
.
روز و شب آغلار کریمی جدّیوین احوالینه
قیل توجّه نائل اولسون دلده کی آمالینه
شیعه لیق تصدیقینی یاز نامه ی اعمالینه
شرمسار ایتمه اونی عقباده یا صاحب زمان
.
- شنبه
- 2
- فروردین
- 1399
- ساعت
- 21:28
- نوشته شده توسط
- ابوالفضل عابدی پور
ارسال دیدگاه