باغ سیری نجه صفاسیز اولماز
بیر شعر ده محتواسیز اولماز
هر شاعره ماندگار اولان شعر
سوز فنینه آشناسیز اولماز
فرهنگی غنی اولان ایل ایچره
سوز حقی داخی اَداسیز اولماز
شاعر متواضع اولسا اوندان
حیِ ازلی رضاسیز اولماز
شایسته دگول تکبر اما
فن صاحبی ادعاسیز اولماز
مؤمنلری چون هوس محکدور
دنیاده بشر هواسیز اولماز
انسانه وَرَع گرکدی شهوت
خوش جلوه لنر نماسیز اولماز
هر قدر اولا کیم جهاندا سرخوش
درده غمه مبتلاسیز اولماز
شادلیق ایده کیم نقدری بیر گون
گُوز یاشی توکوب عزاسیز اولماز
رستم اولاسان جوانلیقوندا
آخر قوجالوب عصاسیز اولماز
سندیرماسا هر کیم اوز غرورین
اعمالی اونون ریاسیز اولماز
بیز معتقدوخ که عالمینون
خلق اولماقی کبریاسیز اولماز
قویدوق قدم اسلامین یولوندا
بو یول ولی پیشواسیز اولماز
هر قدر اولونا خدایه طاعات
بیز معتقدوخ ولاسیز اولماز
مدح ایلَمسم حسینی چاتماز
شعریم باشا کربلاسیز اولماز
شوقیله جانین سالوب بلایه
عاشق باشی چون بلاسیز اولماز
مین نغمه سی وار دیلینده یاره
شوریده اولان نواسیز اولماز
جان نقدی قویوب وصالِ یاره
سوداسی بو گون بهاسیز اولماز
سسلور کی منم امامِ بر حق
حق سالکی رهنماسیز اولماز
انساندی ولی گناهی یوخدی
عصمت سیز اولان خطاسیز اولماز
افعالی خدانمادی سویلور
بو ملکِ جهان خداسیز اولماز
اخطار ویرور که آی بشر بیل
هیچ بیر عملون جزاسیز اولماز
هر دانه اکیلسه تپراق آلتدا
یاز فصلی بیتر بقاسیز اولماز
انسانیده اولماسا اگر دین
آزاده یاشار حیاسیز اولماز
دنیایه یاییلدی بو پیامی
تحسین اولونوب گوزل مرامی
تسخیر ایدوب عشقی ماسوانی
حیران ایلیوبدی انبیانی
عرش اهلینه ناز ایدندی اما
مأوا ایلیوبدی کربلانی
عطشانیدی گلدی وعده گاهه
غربت بورومیشدی نینوانی
اعدائیله روبه رو دایاندی
تسیبح ایلیوب اول خدانی
اُول قدری خداده غرق اولوبدی
یاددان چیخادیبدی اقربانی
اوَلده تحیتیله اُول پیر
ارشاد ایلیوبدی اشقیانی
نادِملری ایلدی اجابت
اغماض ایلیوب ایدن خطانی
سسلندی منم عزیزِ زهرا
یادلارینا سالدی هَل اَتانی
پیغمبریزون بویوردی اِیتدوز
ذُریه سینه روا جفانی
هر قدر دلالت اِیلیوردی
بیلمیدیله حجتِ رسانی
شمشیری نیامیدن که چکدی
یاد ایلدی حیِ کبریانی
صفدر بالاسی بلا چولونده
فریاده چاغیردی مرتضانی
قالخاندا هوایه ذوالفقاری
ظلامه خراب اِیدیب هوانی
وحشتلی بولود مثالی بیردن
باشلارینا یاغدیروب بلانی
فرعونِ زمان گُوزونده سانکی
موسادی آتوب یره عصانی
افسوس اخا اِیدیبله آماج
اُول آینه ی خدا نمانی
پیکاریده عرصه دن قاچانلار
دور اِیتدی عزیزِ مصطفانی
آتدان یره سالدیلار اراذل
قنداقیده سیر اِیدن سمانی
ظلمیله اِیدیبله قانه غلطان
اُول ذاتِ الاه خونبهانی
بی یار گوروبله مقتلینده
اوز اُمتین ایلین دعانی
لعنت ایلیَر ولایت اهلی
اُول شاهه قلج ویران دغانی
لب تشنه شهید اِیدیبله ظلام
مظلومیلره اِیدن عطانی
آخدی قانی عرش اولوب معزّا
گیدی اونا شیعه لر قرانی
قالسون حله شیعه اُول امامه
رونق ویروب انبیا عزانی
جناتِ برینه بو عزاده
حق وعده ویروب اِیدن بکانی
گوللر بو عزاده پرپر اولدی
اوچ پر اوخا توش حنجر اولدی
- دوشنبه
- 15
- اردیبهشت
- 1399
- ساعت
- 11:30
- نوشته شده توسط
- ابوالفضل عابدی پور
- شاعر:
-
حسنعلی بالایی
ارسال دیدگاه