گر اُمید اولسا وصاله، آیریلیق مشکل دگول
عاشقه بو یولدا هئچ درد و بلا نِسگل دگول
.
گول اودور گلزاری ائتسین هم معطّر هم گوزَل
هر او گولده اولماسا عطر و لطافت، گل دگول
.
دوقّوز آی بلبل گرَک دُوزسون اوچ آیدان خاطره
آیری قوش‌دور دوزمَسه بو فرقته، بلبل دگول
.
وار دیلیمده عشقون اوّلدن گوگول ایستر سنی
دیل دگول هر دیل کی اوز دلدارینه مایل دگول
.
گورمَسم گوز گوزگوسونده گول جمالون، وای منه
چون گوزوم منزل‌دی، مهمان گلمَسه منزل دگول
.
قوی ایاقون گوزلریم اوسته ایشقلانسین گوزوم
گورمورم چوخداندی حتماً گوزلریم قابل دگول
.
غم یَمینده قویما غرق اولسون `بشیر”ی، دوت اَلین
آیریلیق غم بحری‌دور، وصلت کیمین ساحل دگول
- دوشنبه
- 15
- اردیبهشت
- 1399
- ساعت
- 12:54
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه