قادرالله نجه گور هرزادی زیبا یارادیب

شکراولا درگهینه هرنیی باجا یارادیب

خلق ادیب سوم شعباندا حسین تک گوزلی

چهارشعباندادا عباس دل آرا یارادیب

پای ویروب ام البنینه بوگوزل مولودی

صورتین مثل علی حی توانا یارادیب

لبلرون غنچه کیمی قاشلارینی مثل کمان

قامتین سرو کیمی گوزلری شهلا یارادیب

چوخ گوزللر یارادیب دهریده خلاق جلیل

حسنده ماه بنی هاشمی تنها یارادیب

بویی بویلاردان اوجا اننی کورک قوللار اوزون

ایری گوز آنلی آچیخ قدینی طوبا یارادیب

بوگوزل طفلی یارالداندا خداوند رحیم

هامی اوصاف برازندیه دارا یارادیب

وارلغت نامه ده هربیر لغتین معناسی

لغت عشقه ابافاضلی معنا یارادیب

آلدی آغوشه ایو اهلی هامیسی آچمادی گوز

ددیلر حتمی یارالدان بونی اعمی یارادیب

ناگهان گلدی حسین گورماقا اوز قارداشینی

نجه بیر منظره گور زاده زهرا یارادیب

اللری اوسته آلوب قارداشینین  قنداقینی

گوردی حی ازلی ماه دل آرا یارادیب

ایستدی اوپسون اوزون آچ دی ابا الفضل گوزونی

باخدی مولاسینا بیر حال غم افزا یارادیب

اوزونه وردی تکان حضرت عباس اوزمان

قنداقیندان چیخادوب قوللاری غوغا یارادیب

بوینونا سالدی حسینین اواوزون قوللارینی

یعنی مولا منی خالق سنه شیدا یارادیب

دوردی فورا ایاقا زینب مرضیه شیم

دولانوب باشلارینا محشرکبری یارادیب

سونرا اوزتوتدی حسینه آتاسی شیرخدا

ددی اوغلوم سنه خالق بونی یارا یارادیب

باخ اوزون قوللارینا .قامتینه.گوزلرینه

شیرعابسدی خدا قاتل اعدا یارادیب

عشقی سنسن بالامون شمعیوه پروانه بودی

سنون آینده وه جانان بونی سقا یارادیب

سهلیدی شیعه یهودینیده مایوس ایلمز

چون سخاوتده خداسی بونی دریا یارادیب

وارآقام مثلی بودنیاده کیمون مولاسی

عشقیده خالق یکتا بونی یکتا یارادیب

توت (بیوک)دامنینی صدقیله آل مطلبیوی

عبدصالحدی خدا شافع فردا یارادیب !