کیمدی عباس ابن حیدر سرور اهل یقین

صاحب اون یدی منصبدور یل امالبنین

بحر تقوا حافظ قرآن سپه سالار دین

روح عرفان بنده ی محبوب رب العالمین

خلقت عباسیده غوغا ائدوب جان آفرین

حق شناسی رشته سینده خلقت عباسه باخ

بیر دلاور خلق ائدوب پروردگار لم یزل

پهلوان لارین ایچینده یوخدی عباسه مثل

سجده ده اهل تواضع جبهه ده شیر جدل

هاردادی حافظ یازا حسنونده بیر زیبا غزل

آی ندن ماه بنی هاشم دی بو آیدان گوزل

گورماقا بدرالدجانی طلعت عباسه باخ

حضرت عباس ایکی دنیانی حیران ایلدی

معجزاتی چوخ یهودینی مسلمان ایلدی

کربلاده جانینی قرآنه قربان ایلدی

عرصه رزمه گئدوب میداندا طوفان ایلدی

تلیدن ائجک سپاه کفری لرزان ایلدی

مرحبا شان و وقار و هیبت عباسه باخ

کوفیان گوردی گلور میدانه بیر صاحب لوا

الده تیغ جان ستان دلده ولی ایلور دعا

یوز قویوبدور خیبره گویا علی المرتضی

بیر هیاهو دوشدی میداندا داغیلدی اشقیا

آختاروردی شمر ملعونی فقط عباس آقا

هارداسان سسلوردی گل بیر قدرت عباسه باخ