تعریف پیامبر اکرم (ص)

از زبان مبارک خوشان (از ولادت تا بعثت)

من رسالت چرخینه بیر اختر تابنده یم

بحر انسانیته بیر گوهر ارزنده یم

بندۀ حقّم ئوزوم هم آخرین پیغمبرم

هر نظردن هر جهتدن انبیادن برترم

آمنه خاتون آنام دور چرخ حُسنه ماهیدی

بندۀ حقدور آتام گُل آدی عبد اللّهیدی

آل هاشمدور قبیلم دیللّری آگاهیدی

شخص مشهورم جهاندا گُل آدیم پاینده دی

تا خدا واردور جهان وار آل هاشم زنده دی

رحمهً للعالمینم من دلیل خلقتم

صاحب خلق عظیمم فردِ با شخصیّتم

بحر غمده ناخدایم رهنمای اُمّتم

پادشاهم هر ایکی دنیاده صاحب مَسندم

اَرضیده آدیم محمّد دور سماده احمدم

سال عام الفیلیده حق ایتدی دنیایه کرم

ربیع الاول آیی قویدوم بو دهره من قدم

گون به گون رشد ایلدیم اولدوم جهاندا محترم

گیچدی گونلر اولدی قرخ یاشیم عجب دورانیدی

مکّه نون اوضاعی اوندا چوخلی ناسامانیدی

سایه سالمیشدی جهالت ابری یکسر باشلارا

ایلیوردی مردم نافهم سجده داشلارا

قیمت و ارزش یوخیدی گوزده کی گوز یاشلارا

زور ئوزیله بعضیلر ایلوردی راحت زندگی

درگهونده مردم مظلوم ایدوردی بندگی

مغزِ مَردم ده یوخیدی ذرّه جه عقل و شعور

وحشی اعراب اولموشیدی آدمیّتدن به دور

مردم نادان ایدوردی قیزلارون زنده به گور

غصّه دن بیچاره مادرلر اولوردی باغریقان

آز قالوردی منقرض اولسون غرض نسلِ زنان

حق منی مأمور ایدوب تا خلقینه امداد ایدم

امر به معروف ایدوب دوز یوللّارا ارشاد ایدم

بنده گی دن بر بریّتدن تمام آزاد ایدم

سعی ایدم تا قویمیام گیتسون خلایق کج یولا

ایلیم تعلیم دینی تا سعادتمند اولا

باشلادیم تبلیغی - دینی خلقه انشاء ایلدیم

قانمیَن اعرابه زشت و خوبی معنا ایلدیم

ایگرمی اوچ ایل زحمت چکوب اسلامی بر پا ایلدیم

امّت نادان قاتوب خون دلی گوز یاشیمه

کوچه لردن ردّ اولاندا توکدولر کول باشیمه

هر نه ظلم اولدی دایاندیم دینمدیم صبر ایلدیم

حقّ ئوزی آگهدی من بو دینه خاطر نیلدیم

یار اولوب الله اَلی کفرین بَساطین پیلدیم

قدرت ایمانیله ییخدیم عدو کاشانه سین

بت پرستانِ زمانین باغلادیم بت خانه سین

اُلماسیدی مرتضا پیروز اولانمازدیم ولی

مصطفایه یاریدی بُحراندا اللّهین اَلی

هر زمان مُشگلده قالدیم سسلدیم من یا علی

فاتح خیبر به فوری مشگلی حلّ ایلدی

دشمنین کابینه سین تیغیله مُنحَّل ایلدی

زور بازوی علی اسلامی ایتدی استوار

حیدرین آدین ایشیتجاق دشمنیم ایتدی فرار

لا فتی الّا علی لا سیف الّا ذوالفقار

حیدره باخدوقجا ایلردیم جهانه افتخار

مرتضی تک هانسی شاهون صف یاران دامادی وار

قویمادی حیدر منیم غم غصّه دن قلبیم دولا

سو ویروب گلزار دینه قویمادی گُللّر سولا

وار امیدیم مرتضانی سویمین لر کور اولا

گر چه من شاهم تمام انبیایه سرورم

بولمین بولسون که پابند ولای حیدرم

لطفِ ذات حقّیله دگمز بو دینه لاطمه

مشعلِ توحیدون هرگز نوری تاپماز خاتمه

دینیمی اِحیا ایدر نسل علی و فاطمه

تا قیامت دشمن دینین ایوی ویرانیدی

دینی زنده ساخلیان اوغلوم حسینون قانیدی

مُصطفایم یاز منیم قولیمجه سن ای « نوحه خوان »

گر چه قولسوز دوشدی نهر اوسته اوگون پرچم وران

بیر گونی اَلده همان پرچم گَلر صاحب زمان (عج)

ذوالفقاریله ایدر ظُلمین ایوین زیر و زَبَر

پرچم عبّاسی نهر علقم اوسته نصب ایدر