یارالدان هر یارانمیشدا شرافت یا رسول الله

تاپوب نسل بشر سنله اصالت یا رسول الله

ایدن نوریله ظلمتده گوزل وجهیله داورلیق

ویرن انسانلارا درس مساوات و برابرلیق

جهانه بذل ایدن روح برابرلیق برادرلیق

سراپا روح احسان و عدالت یا رسول الله

قوتارموش نفس دنیانی هیولای جهالتدن

آییرمیش قرنلر قلبین لجاجتدن عداوتدن

یاراتموش عالمه عالم محبّتدن عدالتدن

تمام عالمه نور هدایت یا رسول الله

چکن تاریخ تبعیضه خط بطلان جاویدان

یغان هر مکتب پوچی اوجالدان صیحه ی وجدان

هامی مکتبلره باشدور جهاندا مکتب قرآن

اولان خورشید دنیای سعادت یا رسول الله

گونشلیقدا گونش نوری، کلیمون نخله ی طوری

اَنَا اللهَ سویلین بیر اود، او اود باشینده کی شوری

حسین ابن علی اوندان تاپان اسرار عاشوری

سراپا جذبه و شور و ولایت یا رسول الله

شفقلرده چکن پرده، گونون قاش ویرمده قاشی

گویون اولدوزلاری اولموش ایاقی آتدا شاباشی

ولاسینده بلا تاپموش حسینین نیزه ده باشی

حسینه اُرگدن درس صداقت یا رسول الله

اَیا نور جهان آرا دل تاریک هر شبده

قویان شمعی یانیشلیقدا، ولی پروانه نی تبده

تجلّایه گلن صوندان بیان و نطق زینبده

وجود بی نهایتده نهایت یا رسول الله

قدومیله ویرن زینت حریم عرش اعلایه

دم گرمینده یوز مین دم، دم گرم مسیحایه

گلن شام غریبانه گجه بیر قانلی صحرایه

ایدن تحسین مردان شجاعت یا رسول الله

جمالی جلوه ی وحدت، جمیل نیکوان خصلت

هامی علّتلره علّت، اوزی معلول بی علّت

اوزی عزّت، سوزی عزّت، ویرن هر عزّته عزّت

تاپان حقدن حقیقتده وراثت یا رسول الله

علیم و عالم و اعلم، سلیم و سالم و اسلم

کریم و اکرم و اعظم، رحیم و راحم و ارحم

دلیل هستی عالم، کمال حقّیله باهم

سلام و سالم و سِلم و سلامت یا رسول الله

خلیل و خالد و مخلود، طریق مقصد و مقصود

حدود حدّ نامحدود، سجید و ساجد و مسجود

سعید و ساعد و مسعود، حمید و حامد و محمود

شعور شعر تمحیده حلاوت یا رسول الله

رفیق و خالق و سبحان، خلیل و خالق منّان

متون دفتر قرآن، سراب چشمه ی ایمان

سراب چشمه ی ایمان، فروغ دیده ی وجدان

وجود ذات ذیجوده علامت یا رسول الله