ملجا دنیای رجا فاطمه

محتجب حجب و حیا فاطمه

مرحمت و لطف و عطا فاطمه

صل علی صل علی فاطمه

فاطمه اسرارین اولوب مرجعی

شعر غمون مطلعینون مصرعی

درک ائده بیلمز بو سوزی مدعی

کشف ائلین یوخ هله مستودعی

یعنی اولوب سر خفا فاطمه

حکمت اگر فکره اولا رهنما

رمزیله تفسیر اولاجاق ماجرا

هر نه کی نادردی ، اولار کیمیا

اولدی آتا دورد قئزا خیرالورا

اولدی ولی خیر نسا فاطمه

صاف ائلیون ذهنیده افکاروزی

صادق ائدون شیوه ی رفتاروزی

یعنی بیلون نحوه ی گفتاروزی

سورا دئیون دکتره بیماروزی

تا ائله سین درده دوا فاطمه

فاطمه چون ضامن اولوب محشره

رد ائله مز کیم قویا یوز محضره

مسگره وئر مس ، زریده زرگره

سائلی اولماز الی بوش قیتره

سنده دئنن صدقیله یا فاطمه

بیر گئجه اوخشاتدوم اونی کوکبه

گلدی ندا ظلم ائله مه مطلبه

عالمی باغلار نخ چادر شبه

یعنی قیاس ائتسون ، ائله زینبه

فاصله یوخ زینب الی فاطمه

ابجد زهرا ایکی ، بیر ، اوچ گلر

زینب آدی آلتیدی ، دوققوز اگر

هر بیرینون جمعینه بیر سال نظر

آلتی گلور حاصلی ای باخبر

زینبی گئت شرح ائله تا.. فاطمه

فاطمه نین شرحین ائدنمز کلام

اونداکی زهرایه ائدور احترام

بیر ، ایکی دنیایه رسول ، اوچ امام

دورد جهتین شیعهه لرین صبح و شام

ائیله دی بئش وعده دعا فاطمه

فاطمه دن ئورگنیب آداب ادب

خلقتی خللاقه اولوب منتخب

نقشیده نقاشه اولوب منتسب

صلتنا فاطمه (ت) المنتجب

کیم اولار ام النجبا فاطمه؟

فاطمه خلقتده اولوب بی بدل

مثنوی غصه لری بی مثل

عمر ایکی قسمت ، هره سی بیر غزل

حی علی کیم دئسه خیر العمل

یعنی دئیور حی علی فاطمه

حیف اولا درک ائتمه دیلر عزتین

بیلمه دی اشرار عرب ، قیمتین

کول باشیننا توک ، بئله بیر مللتین

تاپماز اوتوز مین ایله ، حیثیتین

دهریده غاصب خلفا ، فاطمه

فتنه سالان حالیده بیر فتنه گر

گئتدی بنی ساعده ده سالدی شر

پرده لیدور بو خبر معتبر

محسنی چون اصلیده ئولدوردولر

فقهیده خائن فقها ، فاطمه

ای قلم آیا نیه آشفته سن؟

قویما دوتا فکر ایاقیندان رسن

فاطمه نین دوتدی الینن حسن

کوچه ده تا کسدی یولون ، یول کسن

اولدی ندن غرق بلا فاطمه؟

کوچه ده بیر حوری قالوب بیر ملک

صحنیه ناظردی فلق تا فلک

سوز فدک اوستونده دی یانسین فدک

ثانی ئوزون ایسته دی وورسون محک

شاهد ، حسن اولدی خدا  فاطمه

یاتدی ئورگ ماتم تحمیلیدن

مطلبی بیل نوحه ی تمثیلیدن

آل خبر ای شیعه رخ نیلی دن

کوچه ده زهرا نه گوروب سیلیدن

خاتم مرسل دئدی وا فاطمه

وار یئری غم سینه لره اود سالا

ناحقه باخ حقی وورور ، حق آلا

فاطمه نی سیلی سالوب بیر حالا

دوشدی یوزی اوسته آنا ، هم بالا

ائتدی الی یوزده نوا فاطمه

محرمه نامحرم آچان گون الی

اولمادی بیر کس مدد ائتسون ، ولی

پرده ده بیر ناله اولوب منجلی

همسرووی ووردی عمر یا علی!

طاهره دور اولدی جزا فاطمه

امت پیغمبر اولوب ناسپاس

اصلی آتوب فرعی ائدوب اقتباس

جهل ائله دی گور کیمی کیمنن قیاس

هانسی گلستاندا کبود اولسا یاس

اوردا بیلون قوردی عزا فاطمه

فاجعه دور فاطمه نین ماتمی

هاممی بیلور نوحه ده بیش و کمی

هر غمه باشدور بو غم اعظمی

وار یئری یاتدیرسا اگر عالمی

وار یئری مهدی دئسه یا فاطمه

فکریده تصویر ائله بو منظری

اود قاپی اوستونده توکور اخگری

ذهنیده دیواره یاپوشدور دری

گور آرادا فاطمه ی اطهری

بو ستمه اولدی سزا فاطمه

سوندی سونن اود کیمی، سوسولری

اولمادی فرصت آچا بازولری

باشلادی بیر بیر سئنا پهلولری

تا ننه وای سسله دی آهولری

ائیله دی مسماری جدا فاطمه

ذللته افکار ائلیین گون هبوط

ائیله دی بنیان شرافت سقوط

عالمه زهرا غمی اولدی ثبوت

اوندا کی آلدی بیر الینن قنوت

یاندی علی ، اولدی فدا فاطمه

آغلا قلم ماتم طوفانیه

آغلادی قوشلار داغیلان لانیه

ووردولار اود لانیه آیا نیه؟

غمنن امان یوخدی الف مانیه «امانی»

ناله دی شعر شعرا فاطمه