اولان ای شاهکار صنع بی مثل خدا زینب

نمودِ بندگی آئینه ی ایزد نما زینب

گل بی مثل و مانند ای هامی گلزار خلقتده

آلوبدور گلشن هستی وجودوندان صفا زینب

گُله اوخشاددوم عفو ایله که یوخ گُلده بیله نزهت

طراوتدن دوشه هیهات گُل کان وفا زینب

فروغ نیَر حسنون سنون آفاقی دولدورموش

اودور ورد زبان اولدی هامی ذرَاته یا زینب

بودور دلده غرض هر گون افول و هر حلولینده

دولانسون باشوا شوقیله خورشید و سها زینب

زهی عزَت زهی شوکت آدوندور زینت حیدر

مسمی ایلیوب یزدان عجب اسمون به جا زینب

نه مریم هاجر و حوا سنه مدیوندی هر بانو

تاپوب جمعیت نسوان سنیله چون بها زینب

قلم حیران بیان الکن دوشوبدور قافیه تنگه

مگر لفظ و بیانیله اولار مطلب ادا زینب

سنون شانونده تک بیت غزل دور واژه قران

دگل شانونده هیچ شعر و غزل واره رسا زینب

ایدوبسن همت مرد افکن ای مرد آفرین بانو

تاپوبدور همتوندن دین رحمانی بقا زینب

سنیله هفت شهر عشقه اولموش پایتخت الحق

حریم دل صفای جان او دشت  کربلا زینب

ولیکن گردش ایامدن بو عزَ و جاهیله

آغاردی  بیر یاریم گونده او زلف مشگسا زینب

اولوبدور لاله تک قلبی دیار کوفه ده پر خون

اسارت یوخ شماتتدن گوروب چوخ غم بسا زینب

دلیم یانسون دیسم ابن زیادین مجلسیندن من

فرومایه جماعتدن گوروبدور نه جفا زینب

گوروب دشنامه دیل آچدی او ناپاک و زنازاده

مخاطب ایتدی اول نامردی با صوت رسا زینب

بیوردی ساکت اول دینمه دانشما یابن مرجانه

بیله فکر ایلسن آخر ئولوب ای بی حیا زینب

نه تنها سن دیار شامده ناپاک امیروندن

هراس ایتمز بوگون دخت علی المرتضی زینب

اوتور اگلشدوقون یئرده سنه یتمز فضول اولماق

وگرنه فاش ایدر سن کیمسن آخر برملا زینب

سنون ناپاک دور آغزون گتیرمه قارداشم اسمین

همان بیر اسمه کیم جانین گلوب ایدسون فدا زینب

بیله فکر ایلمه یوخدور منیم اعوان و انصاریم

قولاق ویر بیر ایشید سسلور تمام ماسوا زینب

اگر امر ایلسم یئرگوی سنه ویرمز امان بیر آن

ولیکن صبره مجبورم وئروب حقه رضا زینب

ائولوبدور قارداشم دین اوسته تا دین اولسون عالم گیر

دیریلدر دینی گوز یاشیله بعد موتها زینب

ایدوبسن سن نه فکر ای جانی و مرتد لامذهب

تاپار بیر تازه جان گورسه جهاندا هر بلا زینب

بیز آل عصمتوق گلموش بیزه آیات رحمانی

منم زینب همان دخت عزیز مصطفی زینب

یالانچی سنسن ای کذابین اوغلی هم امیروندور

دانشماز آندولا اللهه دنیاده هوا زینب

بیزوق گلزار خلقتده گل بی مثل و بی همتا

بو گلشنده اولوب دردانه آل عبا زینب

«فغانی» ختم ایله یازما داخی بو نسگل آثاری

یانقلی نوحه یه بی شک ویرر مزد و جزا زینب

عنایت ایلیوب گرچه بو خاتون فلک رتبت

امیدیم وار که محشرده الوندن بیر دوتا زینب