حسین ای مظهر عزت سراپا عزت و شوکت

حسین ای آیت رحمت وجودون علت خلقت

سن ای تندیس رحمانی نمودٍ رحمت مطلق

جلال کبریائی دن اولان ای جلوه سی مشتق

جمادات و نباداته یئر اوسته حجت بر حق

اولوبسان آب و آتش خاک و باده سن ولی نعمت

اولان ای آفرینش دن غرض خلاق یکتایه

خدا زینت وروب سنله هامی دنیا و عقبایه

حقیقی شاخ طوباسن که سالدون عالمه سایه

بو ظل رحمته طوبی اولان ای مصدر رحمت

سن ای برج جلالتده فروغ نیر تابان

سن ای چرخ ولایتده ولّی حضرت جانان

بو شان و عزت و جاهه قالوبدر انبیا حیران

آپاردون گوی همتله بو میدان ایچره سن سبقت

قلم عاجزدی وصفونده سنون چون سر کاف و نون

جلالون وصف ایده بالله اولوبدور عقل لر مجنون

کنایتده تناسب یوخ حدود لفظدن بیرون

اودور آخر تاپوب یکسر سخنورلر دیلی لکنت

سریر فخر و عزتده شه ناسوتیان سنسن

امام و مقتدای بر حق لاهوتیان سنسن

نماز عشقده قبله گه کروبیان سنسن

اولار مقبول درگاه خدا سن ایلین طاعت

سن ای مشکاه نورانی زجاج آسمان آسا

جمالون کوکب درّی چو مصباح فلک پیما

نه شرقی سن نه غربی سن هدایت نوری سن گویا

اولوبدور عالم هستی حسینیم محو بو طلعت

مقامون درکی دنیاده فراسوی خیال اولموش

بو اجلالی خدا ورموش که فوق هر جلال اولموش

کلیم دهر توصیف کمالاتوندا لال اولموش

ایده هر کس سنی تعریف ایدوب اوز قدریجه صحبت

باجون زینب بو وصفونده حصار لفظده محصور

سنون وصفونده الفاظه ایده تکیه اولوب مجبور

ایده تعریف توصیفون دیور بیر کیمسیه مقدور

دیوب بیر قطره دریادن ایدوب هر کیمسنه همت

اولان ای شاخه طوبی جهاندا سایه پروردون

گتورموش سنگ خارانی غم و اندوهه بو دردون

سالوبدور حیرته قارداش جهان اهلین عمل کردون

کسوبلر باشوی تشنه ایدوبلر گوینگون غارت

رحیق و کوثر و تسنیم لب عطشانیوه تشنه

فرات و دجله و کارون لب خندانوه تشنه

اولوبدور گرگ بو صحرا اگرچه قانوه تشنه

بو چلده شمر بی پروا باجوندان سلب ایدوب طاقت

محیط کربلا یکسر نشاندور ربّ العزتدن

بو خلوتگاه وحدتده خبر یوخدور منیتدن

دونن بیر سجده قان ایچره ایدوبسن سن او ساعتدن

بو قانلی قتلگاه ایچره تاپوب معنی عبودیت

اولان ای رتبه اعلایه لطف حقدن دارا

خداوند جهان آرا ایدوب ممتاز و بی همتا

یماق توپراقی عصیاندور ولو کیم تربت طاها

ولی یمن وجودوندان شفادور قانلی بو تربت

اگرچه چرخ ایدوب دلخون مصیبتدن بو نالانی

گلایه ایتمرم قارداش ره جاناندا بیر آنی

تجلی ایلوری گوزده فقط الطاف سبحانی

اودور کیم زینبین صبری ایدر صبری بوگون خجلت

دم جان بخش و پر فیض مسیح آسای زینبدن

امیدیم وار (فغانی) نه نماز نیمه شبدن

ولایت سیز امید اومما داخی العفو و یا ربدن

رضای حقیله مقرون اولوبدور حبّ بو عترت