حسین سنه دانشیم هانسی داستانلار دان؟
غم فراقی سوروش قامتی کمانلاردان
گلوبدی غملی باجون اربعین زیارتینه
اورک قانی توکولور چشم خونفشانلاردان
مخوف چوللری گزدیم که انقلابیمله
آلام قصاصیوی خودکامه حکمرانلاردان
نقدر جهر ایده وابستگان خط شُریح
پوزانمز آدیوی تاریخ جاودانلاردان
یزید بزمینه حتی بو نیّته گیتدیم
آلام آنام توخیان کوینگی سویانلاردان
اساس غارتی بیر بیر گتورموشم قارداش
گلور شهید ایگی بو قانلی ارمغانلاردان
قوجالدی زینبون امّا اوجالدی دین علمی
که سود حاصل اولار عاشقه زیانلاردان
فلک قطاریمی دؤندردی کوفه نین یولونا
او کوفه که دوتولوب جَوّی الامانلاردان
نقدر او شهری دولاندیم تاپانمادیم بیر کس
حجازه اون ایکی مین نامه نی یازانلاردان
ویر اذن کوفه سوزین پرده ده دیوم قارداش
دولیدی رهگذریم اوردا داش ورانلاردان
باشون قالیدی سلامت باشیمی یارمازدیم
ثبات عشقیمی گور باشداکی نشانلاردان
نه سینه داغلیان اولدی، نه یاره باغلیانیم
باخوب اوتانمادیلار قطره قطره قانلاردان
یول آلدی قافله میز کوفه دن گیده شامه
دوتولدی گوش فلک ضجّه و فغانلاردان
امامی ئولدوره کیم اهلبیته گور نیلر
شکایتم وار ابوالفضله ساربانلاردان
بیر عده قورخودان ئولموشدی وقت غارتده
بیر عده ناخوشیدی دامنی یانانلاردان
ئولن ئولوب، ایتن ایتدی، گونوم ایله دؤندی
خبر دوتانمدیم هیچ قبری بی نشانلاردان
او قیز که گوزلری زهرا آناما بنزردی
شیرین دلی دل آلاردی شیرین زبانلاردان
غروب اولاندا باخاردی گوزی فقط قاپیا
گلردی شوره دانشسون گئچن زمانلاردان
دیردی گل چخاق عمه خرابه دن ایشیگه
سوروشاق اکبری یولدان گئچن جوانلاردان
کسیک باشون او گجیکه بیزه قوناق اولدی
یارالی قوش تک او قیز دویدی آشیانلاردان
دیدی بو قان بوریَن گوزلره گوزوم قوربان
یارالی حالدا گلورسن بابا هایانلاردان؟
دولانمشام سنه خاطر پیاده چوللری من
سوروش بو سرّی ایاقیمده کی تیکانلاردان
رقیه دوشدی نفسدن داغلدی هیئتیمیز
بابا دیَه دیَه آیریلدی نوحه خوانلاردان
- پنج شنبه
- 22
- آبان
- 1399
- ساعت
- 17:37
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه