به سبک(ای باد صبا کرب و بلایه گذر ایله)
سنسیز آنوی دوره لیوب غملر اباالفضل
آغلور غموه باشدا قرا معجر اباالفضل
سندن منه قانلی علمون گلدی نشانه
یثربده اولوب ماتموه الده بهانه
بیر سونمین اوتدی بو محن چکسه زبانه
سینمده ائدر قلبیمی خاکستر اباالفضل
سن تک یل نام آور هیجا اولا بیلمز
اون یدّی گوزل منصبه دارا بیلمز
غیرتده ادبده سنه همتا اولا بیلمز
دنیانی اگر دولدارا نام آور اباالفضل
عنقا مَثَلی اوچماقا بال و پریمدون
عشقیم هوسیم جسمیده جان جوهریمدون
مشکلده قالان وقته منیم یاوریمدون
قویدون آنوی بیکس و بی یاور ابالفضل
ای ماه سنیلن باتوب اوچ شانلی ستارم
چارم کسیلوب دهریده مین درده دچارم
باشدان ایاقا دوتمیشام اوت موج شرارم
حاشا بو اوتی سوندیره اشک تر اباالفضل
اوغلی ئوله نون خوش گونی خوش عالمی اولماز
قلبینده اولان یاره سینون مرهمی اولماز
هئچ بیر آنانون من کیمی درد و غمی اولماز
کیم درد و مصیبتده منه بنذز اباالفضل
آثار مصیبت گورونور غملی سسیمده
روحیم قوشی چوخ تنگه گلوب جان قفسیمده
آرزو ائدورم من ئولومی هر نفسیمده
دورت اوغلی ئولن غملی آنا نیلر اباالفضل
اوت دوشمسه شمعون جانینا کاهشه چاتماز
قاره گون اولان خوش گونیلن سازشه چاتماز
بیچاره آنوین ئولمسه آرامشه چاتماز
سنسیز ئوزونه حقدن ئولوم ایستر اباالفضل
چاتماز منیم آغلار گوزومه دیده سی ابرون
دورد اوغلوم ئولوب یوخدی منه معنی سی صبرون
دئیلر اوجا قامت بالا چوخ خیردادی قبرون
یانام بو غمه عمریمی سرتاسر اباالفضل
داغلی اورکیم آتش دردیله یانوبدی
ناله م گئجه گوندوز منیم عرشه دایانوبدی
دئیلر کی سنون ساق گوزوه اوخ توخانوبدی
قربان او یارالی گوزه بو گوزلر اباالفضل
ای سرو کیمین قدّی اولان ظلمیله خولسوز
باشدا یارا آتدان یخیلان تپراقا قولسوز
آخرده اوغللار آناسی قالدی اوغولسوز
هر غمدن اولوبدی بو غمیم برتر اباالفضل
سندن صورا دویدوم من اوغول ارض و سمادن
تا وار نفسیم چکمرم ال آه و نوادن
ای رتبه سی محشر گونی برتر شهدادن
دردون یارادوبدی منه مین محشر اباالفضل
عیسی نفسیم معجزه بار دگر ایله
ظلمت گئجه نی نوکروه چون سحر ایله
درمان اولونا دردی «صبایه» نظر ایله
واردی نفسونده دم جان پرور اباالفضل
- یکشنبه
- 25
- آبان
- 1399
- ساعت
- 17:27
- نوشته شده توسط
- یوسف اکبری
- شاعر:
-
محمدباقر دائمی
ارسال دیدگاه