به سبک(یا امام زمان شیعه ده احساسه باخ)
یا امام رضا عشق شررباره باخ
اللری سینه‌ده غمزده زوّاره باخ
هامی ایلور نوا
ئوزون ایله دوا
اوجالوب گویلره
یا رضا یا رضا
یا رضا جان (2)
گلمیشوق شوقیله شهر خراسانه بیز
عاشقوک شاهد اُول شاه شهیدانه بیز
سسلروق آدوی گور نجه جانانه بیز
آغلیور عشقیله سینه‌لری یاره باخ
هامی ایلور نوا
ئوزون ایله دوا
اوجالوب گویلره
یا رضا یا رضا
یا رضا جان (2)
سن آنون فاطمه مشکلی آسان ایله
آغلیان گوزلری جمله خرامان ایله
شیعه‌نون باخ ئوزون دردینه درمان ایله
گل گلزاریلر توشِ اولوب خاره باخ
لطفون ایله عطا
ئوزون ایله دوا
اوجالوب گویلره
یا رضا یا رضا
یا رضا جان (2)
کرمون وار آقا فاطمه‌نین اوغلوسان
صاحب سلطنت حق دینین اوغلوسان
آدوا جان فدا پنج تنین اوغلوسان
یا امام رضا نوکرِ درباره باخ
سسلور اهل عزا
ئوزون ایله دوا
اوجالوب گویلره
یا رضا یا رضا
یا رضا جان (2)
گینده کربلا صحبتی طوفان ایدور
شیعه‌لر جانینی جدّوه قربان ایدور
اوجالان ناله‌لر عالمی حیران ایدور
سن آنون فاطمه دیده خونباره باخ
آغلورام من آقا
ئوزون ایله دوا
اوجالوب گویلره
یا رضا یا رضا
یا رضا جان (2)
اوجالوبدی گویه عشقیله احساسی‌میز
بسدی ثبت اولسا گر بزم غم و یاسی‌میز
جدّیوی سسلروق تا گله عباسی‌میز
گوزلرون قربانی اوندا علمداره باخ
شاه درد آشنا
هامی ایلور نوا
اوجالوب گویلره
یا رضا یا رضا
یا رضا جان (2)
جدّوه هرزمان سن‌کیمی یاس ساخلاروق
آغلیوب آغلادوب سینه‌لری داغلاروق
سنی یاده سالوب فاطمیه آغلاروق
بزم غمده بوگون غمزده حُضّاره باخ
هامّیسی مبتلا
ئوزون ایله دوا
اوجالوب گویلره
یا رضا یا رضا
یا رضا جان (2)
«غمکشین» نوحه‌سی اَهل عزانین سوزی
سنده‌‌دی هر زمان باخ آقا آغلار گوزی
سینه‌سین غصّه‌دن دائمی داغلار ئوزی
سن عنایت ایله اولماسین آواره باخ
روحیوه جان فدا
هامی ایلور نوا
اوجالوب گویلره
یا رضا یا رضا
یا رضا جان (2)
- یکشنبه
- 25
- آبان
- 1399
- ساعت
- 18:5
- نوشته شده توسط
- یوسف اکبری
ارسال دیدگاه