بیر سخنور سوزینی نظمه چکور طبع روان
مشهده قصد زیارتله گلوب زوج جوان
اولدولار وقتی پیاده گیده‌لر پابوسه
مَتلک بیر نفر آتدی او جوان ناموسه
صاحبی دوندی باخوبدور ایله که پشت سره
ساتاشوبدور گوزی هیکلده قوی بیر نفره
غیرتی جوشه گلوب ویردی اورک ئوز ئوزینه
نه گوجی واردی وروب سیلی او شخصون یوزینه
سیلی یَن شخص ولی دینمدی بیر سوزدیمدی
ایله بیل که او قوی هیکلی سیلی یِمَدی
ولی ناموسینه خاطر آقانون زوّاری
وردی بیر سیلی دیگر اونیچون تکراری
دوره سین آلدیلا فی الفوری قصاص ایتسونلر
پهلوان قویمادی امر ایتدی قویون گیتسونلر
همرَهینده گوروسوز واردی جوان ناموسی
اولاجاقلار بو مشخّصدی رضا پابوسی
یولدا القصّه اریندن او خانم ایتدی سؤال
نیه وِردون او ادب صاحبنی قصد جدال
اوزگه ناموسینه هرکس دیدی آتسا مَتلک
ایله بیرشخصی ادب ایتمگه واجبدی کُتک
خانم ئوز صاحبنی کلّ ملامت ایتدی
دیدی توهین ایلیَن شخص اودگولدی، گیتدی
ایشیدوب اولدی جوانون ایکی ال بیرباشی
آخدی رخسارینه شرمیندن آخان گوزیاشی
دوگولن شخصیده آهسته گلوبدور حاصل
حرم ضامن آهویه اولوبدور داخل
الی قوینوندا ادبلن دیدی ای شاه جهان
ایکی سیلی منه ناحق یره وِردی او جوان
منکه بیرسوز دیمدیم سیلینی امّا یمیشم
سنه خاطر ولی سیلی وِرانا دینمه‌میشم
قولومون قدرتی وار زور دیسونلر یمرَم
اوزگه ناموسینه توهینی بیلورسن دیمرَم
فکر قیل نوکروین سنده جزا توشه سینه
بو ایکی سیلینی یاز دفتریوین گوشه سینه
بلی قرآن بویوروب عاقبت خوب وبدی
کیچدی ایلّر ولی بیرگون او جوان مَشَدی
گلدی تهرانیده ویزاسینی آلسون گیتسون
قبر ششگوشه‌ی مولانی زیارت ایتسون
سوزی سر هنگیله کج گلدی یریندن دوردی
بیر ایکی سیلی او سرهنگین اوزیندن وردی
دستگیر اولدی غرض دوشدی اوگون زندانه
گیتسون اولمادی مُیسّر حرم جانانه
اولدی محبوس، سوزوم یوخ نچه ایلّر قالدی
پهلوانین اورگین غصّه و غملر آلدی
بیر گونی حبسیده مَغمومیدی اول نیک مرام
گلدی سلّولّارا باش چکمگه سرهنگ تمام
اونی گورجک باخوب عنقا کیمی بال وپرینه
ویردی دستور،گتورسونلر اونی دفترینه
گتدیلر دفتر سرهنگه دیوم ما حَصَلین
دوردی سرهنگ، اونون حرمتیله ئوپدی الین
دیدی زندانیده نیلورسن اولوبدور نه علل
دیدی همکاروزلَن ایلمشوک جزئی جدل
من جسارت ایلیوب وِردیم ایکی سیلی اونا
اودا قویمادی زیارت توزی رخساره قونا
دیدی سرهنگ، سنه منده جسارت ایلدیم
ولی قویدون منی مولامی زیارت ایلدیم
سیلی وِردیم سنه مشهدده اوگون ئوز باشما
عیبی یوخ ایندی وِروبسان عوضین یولداشما
اونا سرهنگ ئوزی، شرمنده لیگین آندیردی
امر ایدوب گتدیله پرونده سینی یاندیردی
دیدی هر حاجتوین اولّام ئوزوم اوستنده
کربلانینده که ویزاسی گوزوم اوستنده
گوزلری دولدی اونون عرض ایلیوب سرهنگه
لطف مولایه گوره گلدی بو سینم تنگه
اذن ویرسون گیدیم اوّلده رضا محضرینه
یدیگیم سیلی لری یازمشمیش دفترینه
بیر تشکّر ایلیوم صحن ورواقیندن ئوپوم
بیرده خادم لرینون بیربیر ایاقیندن ئوپوم
معرفتدور بلی اوجه یتورَن انسانی
ایندی عرض ایت آقا سن بیل او جوادون جانی
عشق کویینده بیزه دلبر دلجوسن آقا
سن غریب الغربا ضامن آهوسن آقا
رحمتین ابری، نولار یاغماقا خاطر دولاسان
دردیمیز چوخدی حوائجلره ضامن اولاسان
سَنیچون، گیزلین اولان درد، اولور جمله علن
بیلوسن واردی مریضلر طرفیندَنده گلن
نا امیدلیک توزونی باشلارا لطف ایت اَلَمه
ویرشفا نسخه لرین بیزلری مأیوس ایلَمه
رزقی بانیدی، رشیدی بیله بیر اشعاره
دردی گر اولسا رضا ایلیه جکدور چاره️
- یکشنبه
- 25
- آبان
- 1399
- ساعت
- 18:10
- نوشته شده توسط
- یوسف اکبری
- شاعر:
-
علی اکبر رشیدی
ارسال دیدگاه