به سبک(زینبم جان اوستیم)
به سبک(اذن ویر یارب گله)
جان ویرور پیغمبر اکرم شه ابرار ئولور
رهبر دنیای اسلام و دلِ افکار ئولور
جان ویرور بنیان گذار مکتب آزادگی
صاحب قانون دنیای جدید زندگی
ضدّ تبعیضات و خوی فطرت و درّندگی
مرد استقلال و ضدّ کفر و استعمار ئولور
ذورق حق ایمدی امواج خروشان اوسته دی
پیشوایِ مسلمینِ واقعی جان اوسته دی
نصف شب پروانه لر شمعی فروزان اوسته دی
چشمۀ فیض و بقا و مطلع الانوار ئولور
صاحب قرآن ئولور معناده قرآن آغلوری
زهره و مرّیخ و ماه و مهر و کیوان آغلوری
واقعاً افلاکیان و خاکیان قان آغلوری
باعث ایجاد کلّ ثابت و سیّار ئولور
هالۀ غم پرده کشدور عارض ماه اوستونه
یوز قویوبدور لشگر حسرت یدالله اوستونه
گرد مرگ غم قونوبدی هیبت الله اوستونه
اختیار حق گیدور چون احمد مختار ئولور
خوشه های خرمن گلزار پیغمبر سولوب
ابر نیسان تک کنار گلده بلبللر دولوب
باغبان گلشن عشقین حیاتی قورتولوب
گلستان و بوستان و گلشن و گلزار ئولور
دیدۀ پیغمبر اکرم باخور اطفالینه
فکر ایدور بیربیر تمام آینده و آمالینه
ناگهان ایلور نظاره کربلا گودالینه
قانینه غلطان گورور اؤز اوغلونی بی یار ئولور
#گریز_به_قتلگاه
تشنه دور داغ قوملار اوستوندن فرات اوسته باخور
چشمه چشمه پیکریندن توپراق اوسته قان آخور
زلفینه زهرا او قانی خاک و خونیله یاخور
بیر مُعیّر عشق عیّاری تاپوب معیار ئولور
سرزمین کربلا گویا منای عشقدور
نالۀ نی دور اوجالمیش نینوای عشقدور
گلشن وحدت حریم باصفای عشقدور
آتشی بیر گل میان تیغه های عشقدور
شمع فانوس هدایت آز قالور خاموش اولا
اوخلار آلتدا سرّ حق پنهان و پرده پوش اولا
گل وجودی داشلار آلتیندا قالوب مفروش اولا
عهد و پیمان السته قان ایدور ایثار ئولور
پیکر عنقای قاف حقّ اولوبدی غرق خون
ذورق امّت قالوب دریا ایچینده واژگون
کاخ آزادی یر اوستونده قالوبدی سرخ گون
کاخ اولوبدی منهدم ظاهرده چون معمار ئولور
ایستور اولسون انبیا و اولیادن سرفراز
ایلوری هر لحظه ده معناده کسب امتیاز
قلبینون قانین یغوبدی ائتسون آب دستماز
صاحب خون خداوند حق دادار ئولور
ختم قیل #هادی سوزون خوشدور یقیناً مجملی
فیضیوه شرکتدی «شوریّ» و «چرندابی» ، «علی»(1)
روح پاک هر وقتیده معناده حاضردور بلی
روح ئولمز ئولسه جسم و پیکر بی عار ئولور
(1) مرحوم #شوری_تبریزی (صاحب کتاب #زبدةالمصائب) از شاعران دربار امام حسین (ع) ، مرحوم «چرندابی» از نوحه خوانان تبریز و مرحوم مشهدی علی خرازی از حسینیان عزادار و هر سه از دوستان صمیمی مرحوم هادی تبریزی بودند
- دوشنبه
- 26
- آبان
- 1399
- ساعت
- 10:8
- نوشته شده توسط
- یوسف اکبری
- شاعر:
-
مرحوم هادی تبریزی
ارسال دیدگاه