من دردمندیوم بابا درمانه گلمیشم
یاز نسخه می قسم جانوا جانه گلمیشم
الله بلور بو قرخ گونی عمروم گچوب نجه
دشمن وروب گونوزلری دیسگنمیشم گجه
ایتسن سؤال دردیمی کیملر بلر بابا
بلمز غریبه بلسه یتیملر بلر بابا
قرخ گوندی سن بو تللریمه شانه ورموسان
دیداره گلمیشم، نیه پیشوازه دورموسان؟
بیز مین قدم سنه ساری گلدیق اورکده غم
یورقون قوناقلارا ساری گل، سنده بیر قدم
یولاردا زنگ قافله نی قیردیلار بابا
یعنی باجیم رقیه نی چوخ وردیلار بابا
قربان اولوم او سینیه که اوخ دلوب بابا
دور باغریقان سکینه سفردن گلوب بابا
اشکی توکولمز آغلیان قلبی یانماسا
من ساکت اولمارام عموم عباس اویانماسا
قبری اونون دیوله فراتین یولوندادی
الاندا گوزلریم او کسیلمش قولوندادی
عمم جانی دانش بابا جانیم دوداقدادی
باب الحوائجین نیه قبری اوزاقدادی
سن اولماسان گلی چمنی نیلورم بابا
من کربلالیم وطنی نیلورم بابا
گلزار کربلا صولوب اما گل آچمادی
ناکام ئولیدی حرمله اصغر دل آچمادی
- سه شنبه
- 27
- آبان
- 1399
- ساعت
- 11:53
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه