الا اي دين يولوندا قان ويرنلر
گوزل پيمانه خاطرجان ويرنلر
حق يكتايه جان قربان ويرنلر
گلور زينب چيخون بير پيشيوازه
فدا جانيم سيزون تك دلنوازه
سلام اولسون سيزه قانه باتانلار
مجازي عشقيني باشدان آتانلار
بر سوزانیده عطشان ياتانلار
دورون گلدي گئنه ديداره زينب
گوني بختي لباسي قاره زينب
الا اي شاه دين سرو خجسته
باجون زينب گلوبدور زار و خسته
اسيراولموشدي چون بيرعده پسته
ورولدي ديل ياراسي جانه گلدي
دوا ايت درديـنه درمـانه گلدي
حسين سن سن منيم روح و روانيم
اياقدان دوشموشم يورقوندي جانيم
بلالي زينبم. يوخدور توانيم
ايدوب هجران اوخي قلبيمي ياره
سالوب غــملر مـني غــملي حصاره
حسين سندن كه جبريلن ال اوزدوم
فراقونده ئوزه گوزياشي دوزدوم
داياندوم محنت عظمايه دوزدوم
وفالي ائت نظر اهل وفايه
گـتوردیم غــم قطارين كربلايه
مزارونده ياتوبسان جانيمه جان
يانوندا وار ايكي اوغلون اورگ قان
سن عطشان اكبر عطشان اصغرعطشان
پوزلموش حالوه عالملر آغلار
رباب و ليلي غمدن سينه داغلار
سنون تك بير نفر مظلوم ئولن يوخ
ورولدي قلبوه اوچ شعبه بيراوخ
جداده باشوه داش ورديلار چوخ
اولار داش ورديلار باخدوقجا يانديم
بو اعـظم ظـلمه صبر ایتدیم دايانديم
اجازه وير ديوم درد و بلادن
بلالي يولدا كي جور و جفادن
او خصم بي حيا شمر دغادن
يوخيدون قمچي لردن جانه گلديم
گئجه گوندوز حسين افغانه گلديم
چكيلدوك مجلس اغياره گيتدوك
عزالي باغلي قول پيكاره گيتدوك
يزيدي يخماقا درباره گيتدوك
جلوس ائتميشدي تخت اوسته او ظالم
سـكوت اولــموشـدي درباريـنده حاكم
باشون گوردوم اودم طشت طلاده
الينده خيزران. اُُول هنده زاده
دوداقوندن. وراندا مست باده
گلوبدور عترتون ني تك نوايه
چاغوردوم منده زهراني هرايه
دوروب قصرايچره من گفتاره چيخديم
يزيدي يخماقا. اشعاره. چيخديم
او پست شوميلن. پيكاره چيخديم
دانیشدیم حق سوزی مقصوده يتديم
سـتم كـاشـانه سين ويـرانه ايتديم
منه ئوز ويردي امّاعُمده بير غم
بو غم اولدی منه بیر داغ اعظم
گتوردوم عترتون قارداش بيرين كم
رقيّون عمری چون یتدی تمامه
سفير ايتديم اوني من شهر شامه
رقييوندن سوروشماسن حسينجان
ديمه نولدي بالام ای شاه خوبان
اورگ ياره گيدوب زهرايه مهمان
پوزوبدي حاليمي اُول ماه طلعت
ملالين شرح ايدم يوخ ديلده طاقت
شماتتدن بالام افغانه گلدي
غمیندن نالیه بيگانه گلدي
آجيندان يوخ جفادن جانه گلدي
سسين ویرانه دن قصره يتوردي
يــزيد فــاســقي جـانه گتوردي
او قصر ايچره يزيد پست و نادان
ديدي بو سس مني ايلوب پريشان
گئجه وقتی گلور هاردان بو افغان
گورون كيمدورنه ايستور تئز ويرون سيز
يانقلي آهي وار خاموش ائدون سيز
گئجه بيردن. ايشقلاندي خرابه
باشون گلدي قوناق اول دلكبابه
بالون باخدي منه بيرده ربابه
ديديم گلدی قیزیم دردون دوا سي
یــواش آغــوشه آل چوخــدور ياراسي
گلوب باشه طرف اُول ماهپاره
گوروبدور لبلرونده واردي ياره
توكوب گوزياشینی غمدن عذاره
دوداقين قويدي اول قانلي دوداقه
ايدوب جانين فدا سن تك قوناقه
آخوندي من كيمين گوزلر دولي قان
اولوب هجرونده محزون و نواخوان
ديور هر بيرنفس مولا حسين جان
عـــنايت ايت اونــا دار فناده
قالــوب حـسرت گوزي كرببلاده
- سه شنبه
- 27
- آبان
- 1399
- ساعت
- 12:8
- نوشته شده توسط
- یوسف اکبری
ارسال دیدگاه