گینه ده پیک عزا بیر خبر غم گتیریب
گوز یاشین خون دیله ایلدی مدغم گتیریب
نه خبردور کی دیلی بحر غمه غرق ائلییر
موج محنت وورولور دیده لره نم گتیریب
خبر آلدیم ندی بو ناله و افغان وبکاء
اوجالوب نوحه سسی دیللره ماتم گتیریب
اربعیندور دئدیلر زینب مظلومه بو گون
دیده ده گلشن عشقه سپه شبنم گتیریب
قورتاروب رنج اسارت آچیلوب قید جفا
بیر کیچیک قافله ده محنت اعظم گتیریب
اوغلی قارداشی ئولن چوخدی ولی قافله ده
بالا دردی آنالار قدین ائدیب خم گتیریب
آنالار اوغلونا آغلور باجیلار قارداشینا
بیر بیره سس قوشوب آهنگینی باهم گتیریب
حقی اثبات ائلییب زینب شایسته مقام
پرچم فتحی او خاتون مکرّم گتیریب
فاتح شامیدی ظلامی سر افکنده ائدیب
فتحیدن عمده نشان بیر قره پرچم گتیریب
پرچم فتح یقین قرمز اولار قاره دی بو
یاسلیدور .قاره نی ایلیبدی مقدّم گتیریب
قویمادی پرچم دینی یخلا پایه سینی
خطبه سیله ائلدی شامیده محکم گتیریب
گلور اما او گوز ه ل درّینی ویرانه آلوب
وئرمدی قیزلار ایچینده اونی بیر کم گتیریب
آیریلاندا دئدی ویرانه سرادن او خانم
نسگیلی چوخدی منی درده رقیم گتیریب
دور گئده ک سسلدی آی نازلی بالام یاتما اویان
غم غم اوستن منه هجرین بالا هر دم گتیریب
سنی وئرمشدی امانت منه تاپشوردی بابان
که امانت آپاران بیرده مسلّم گتیریب
من امینم نه دیوم قارداشما آلسا خبر
منه بو آیریلیقین آیری بیر عالم گتیریب
شامیدن غملی قطارین چکوب القصه خانم
کربلا سمتینه ایلوبدی منظّم گتیریب
یوسف فاطمه نین کوینگین اللردن آلوب
جان کیمی سینه سینه ایلدی منضم گتیریب
کربلایه یئتیشیب قافله باشلاندی نوا
لرزیه عرشی اودم عترت خاتم گتیریب
کاروان اهلی انوب ناقه دن اول دشت غمه
یئر گویی ناله لری نالیه اولدم گتیریب
زینبین دوتدی الین عزتیله زین العباد
آتانون قبر ینه چوخ حالتی بر هم گتیریب
گوستریب قبری خانم زینبه ساکت دایانوب
ائشیده تا نه سوز ایلیبدی فراهم گتیریب
اولین کلمه سی اولدی .یارالارون نئجه دی
دور باجون یاروه گوز یاشینی مرهم گتیریب
دور حسین زینبه باخسان تانیمازسان اونی سن
غم سالوب دیلدن اونی قدین ائدیب خم گتیریب
آیریلیق گور باجیوی سالدی نه حاله یارالی
گله بیلمزدی ائدیب عشق مصمم گتیریب
سنی مندن آییران روحیمی تندن آییروب
ئولدوروب زینبیده اونداکی سندن آییروب
آییران وقته عدو قویمادی مقتلده اخا
بیر دویونجا سنه دیل داغلیا دیل خسته باجون
گلمشم غمله دولان قلبی بوشالدام بو چوله
آغلیور علت اودور کی بو مزار اوسته باجون
دشمن ایچره اوجادان آغلامادیم صبر ائلدیم
درج اشکی بوراجاق ساخلادی سر بسته باجون
جان گلر زینبه بیر یول اونی سن دیندیرسن
تئز ئولر یوخسا اولوبدی سنه وابسته باجون
آغلیام ایسته میشم قمچی ووروبلار باشما
چاره یوخ اولموشیدی قوش کیمی پربسته باجون
قبرین اوسته الی بوش گلمیشم عفو ایله منی
لعن ائدر دیلده مدام غارت ائدن پسته باجون
قبرین اوسته گتیره للر گولیلن فرش وگلاب
نه گلابی نه اخا آلمادی گل دسته باجون
گوزومون یاشینی اما الرم مثل گلاب
سنگ قبرین ائلیه اشکیله تا شسته باجون
قانلی پیراهنویوی قبروین اوسته سره رم
گل ندیر گلشنه بنذیر گتریب خسته باجون
هر بیر اوخ یاره سینه مین گل آچوب معناده
گتیریب مینلر الینده بورا گلدسته باجون
آغیدی رنگی بونون قرمزی قانون قاریشیب
لالیه بنذ دیری بو دیل بشکسته باجون
حیف بو لاله لرین اوسته دوشوب آت ایاقی
باخا بیلمز کی گورور نقشینی بر جسته باجون
نیلوسن گل .گل وغنچیله یاتوبسان باهم
آغلیار هم گله هم غنچیه پیوسته باجون
گل علی اکبر یدی غنچه علی اصغریدی
گولی پرپر اوزی گورموشدی عبا اوسته باجون
غنچه نی اوخ نه حالا سالدی سنی یاندوردی
شرح ائده نمز محنین ای شه وارسته باجون
اولمادی سو سارالوب گلشنین ای گل پرور
آلیشیب یاندی او غمدن سنه پا بسته باجون
قورخورام سو آدین اصغر ائشیده تئز اویانا
دانشور علت اودوربو سوزی آهسته باجون
یا حسین مشکل (احسانی) اوزون حل ائله یا
قیل سفارش قوتارا غمدن اونی خسته باجون
- سه شنبه
- 27
- آبان
- 1399
- ساعت
- 12:15
- نوشته شده توسط
- یوسف اکبری
- شاعر:
-
احسان تبریزی
ارسال دیدگاه