ای گوزل قارداشمون نازلی دل آراسی قیزیم
باشه یتدی باشمون درد و بلایاسی قیزیم
قارداشیم گلشنینه تازه شگفته گلیدون
ای گلستان شریعت گل رعناسی قیزیم
حیف اولا تز سنی پرپر ایلدی باد جفا
بیله ایجاب ایلدی دهر تقاضاسی قیزیم
ئولماقون گرچه ملول ایلدی اهل حرمی
لیک دین اهلینه وار چوخلی مزایاسی قیزیم
قارداشیم باغلادیقی روز الستنده کی عهد
واریدی عاشق و معشوق آرا سوداسی قیزیم
خویش و انصارینی بیر بیر هاموسین ویردی فدا
سنیدون آخر عهدینده کی امضاسی قیزیم
سن که بو عالمی سیر ایلدون اوچ سنّویله
اولدی صد ساله لرین فلسفه انشاسی قیزیم
نسگلون هر دله تأثیر ایلیوب یاندراجاق
نجه یاندیم دلیمون گیتدی تواناسی قیزیم
حقلیم یاد ایلدوقجا بالا نسگل لروی
موج ایده گوزلریمون اشکیله دریاسی قیزیم
سن دگلدون بو مکاندا سوروشاردون باباوی
قارداشون اکبری یا که عمون عباسی قیزیم
گیدوروخ سن سوروشانلار یاننا سنده اویان
رهسپار اول داخی یوخ دشمنون ایذاسی قیزیم
آیریلوم من نجه سندن که گلنده بو یره
سنیدون محملمون انجمن آراسی قیزیم
قارداشیم گر خبر آلسا سنی مندن نه دیوم
نجه اولسون دلیمون صحبته گویاسی قیزیم
یادگار شه عطشانیدون آخر منه سن
سنیدون حال وداعنده وصایاسی قیزیم
غصه مرگ ایتدی سنی ظلم یزید کافر
اوزی عدل ایلسون حقّین حق یکتاسی قیزیم
باخما پوزقوندی مزارون اوجادور قصر یزید
ظالمون بش گون اولار عزّت دنیاسی قیزیم
ولی بیرگون بو خرابه یر اولار مأمن خلق
فدیگان ره عشقین بودی معناسی قیزیم
درگه پاکیوه شهلر قویاجاقدور یوزینی
چوخ اولار مدفنوین عاشق شیداسی قیزیم
چوخلی یرده آچلار سفره سنون آدویله
هر کسین اولسا اورکده نه منایاسی قیزیم
قاپوین سائیلدی «ذهنی» بیچاره گلوب
آناوین قبرینی گورماقدی تقاضاسی قیزیم
دم ویروب «سائله» «خوندل» سوزی استاد سخن (1)
زینب ای فاطمه نون مظهر تقواسی قیزیم
- سه شنبه
- 27
- آبان
- 1399
- ساعت
- 12:51
- نوشته شده توسط
- یوسف اکبری
ارسال دیدگاه