اهل دنيايه رقيه عشقين اعلان ايلدي
كاخ ظلمي تيشه آهيله ويران ايلدي
تا مقيم اولدي ديار شامده، گل پيكري
گوشه ويرانه ني رشگ گلستان ايلدي
خانه خانه گزدي شطرنج محبت قلعه سين
عشقيده شاهي ، گداني مات و حيران ايلدي
مكتب توحيده تبديل ائتدي اول ويرانه ني
شامده تبليغ دين ، احياي قرآن ايلدي
بير نئچه گونده صفا لا نديردي بو جنت گلي
گلخن ويرانه ني گلزار رضوان ايلد ي
زمزم اشكيله آرتيردي صفا ، ويرانيه
كعبه ارباب عشق و اهل ايمان ايلدي
سالك كوي محبت ائتدي هو حق،ذ كريني
اول خرابه منزلي بير بزم عرفان ايلدي
آيه آيه مصحف عشق و وفانين سوره سين
بير به بير عاشق لره تفسير و اعلان ايلدي
دوزدي زنجير اسارتدن شكايت ائتمدي
هر مصيبتده ، بلاده شكر يزدان ايلدي
اولدي گل، خار مغيلان قوردي باش هر بير قدم
گل اياقون اوپدي اخذ شوكت و شان ايلدي
ائتدي بوينوندا بلا زنجيريني طوق شرف
باشدا قمچي ياره سين تاج زر افشان ايلدي
نه شكايت ساربان لاردان نه شكوه ناقه دن
نه گلايه قمچيدن يوللاردا عنوان ايلدي
ياندي سس سيز شمعه پروانه يانان تك دينمدي
عمه سين يانديردي ياخدي باغرين آلقان ايلدي
باشينه جمع اولدي عشقينده يانان پروانه لر
يانماقا اوز جانيني شمع شبستان ايلدي
بير گئجه ياتدي آتاسين گوردي روياده خانم
تا آييلدي ، آرزوي وصل جانان ايلدي
ناله ائتدي بو تمناده آييتدي عمه سين
باشلادي هجران اليندن شكوه بير آن ايلدي
عمه جان سويله ندن گلمير بابام بو منزله
باغريمي آخر منيم قان درد هجران ايلدي
اول گئجه زهرا كيمي آچدي دعايه اللرين
باشلادي راز و نياز حي سبحان ايلدي
گوردوم اللهدان ئولوم ايستور آنام زهرا كيمي
بو تمنا فكريمي پوزدي پريشان ايلدي
سويلديم آخر قيزيم بونه دعا دور ايلوسن
گوردوم اشكين تو كدي گوزدن شور و افغان ايلدي
سويلدي عمه حياتيمدان داها من دويموشام
قلبيمي بو سوزهجران يانديروب قان ايلدي
آغلادي ويرانيه آخر گتوردي ياريني
درد بي درمانينه ، وصليله درمان ايلدي
چكدي جان تك باغرينا جانان باشين مين شوقيله
ايگليوب اوپدي او باشي زيب دامان ايلدي
دوزدي هجره شوق وصل ياريله ويرانه ده
عاقبت جانا نيني بير لحظه مهمان ايلدي
شمع تك ياندي سو اولدي عاقبت اولدي خموش
بير چمن پروانه ني بو غمده سوزان ايلدي
اولمادي آسوده خاطر بير نفس ويرانه ده
عاقبت اوز جانيني جانانه قربان ايلدي
- چهارشنبه
- 28
- آبان
- 1399
- ساعت
- 11:59
- نوشته شده توسط
- یوسف اکبری
ارسال دیدگاه