نهر علقمه قویدی چون قدم
کربلا وزیری
تاجدار اباالفضل
تشنه لب لره سو آپارماقا
جان و دلدن ائتدی
افتخار اباالفضل
تاپدی خضر عطشان
چشمۀ حیاتی
تشنه لر ائشیتدی
نالۀ فراتی
گوردی نهرده موج ائدر سوئی
خود سرانه اولموش
پهن و دشته جاری
آتدی اول سودان بیر قدر گویه
دوندی باخدی ناگه
خیمه گاهه ساری
یعنی قورخمیون نهری آلمیشام
خیمیه یتورم
مشک آبداری
آلدی اوجونا ایچمدی سودان
ایلدی فراتی
شرمسار اباالفضل
خیردا اصغرون تشنه لب لری
یا سکینه حالی
صبرین الدن آلدی
حال زارینه اول هنرورین
باطناً فراتون
ناله سی اوجالدی
مشکین اندیروب دولدوروب سودان
چیگنینه سو مشکین
همتیله سالدی
دوندروب یوزین چخدی نهریدن
اولدی خیمه گاهه
رهسپار اباالفضل
ازدحامیلن ائتدیلر هجوم
صاحب لوانین
اوسته قوم کافر
تیغ تیزیلن اول جماعت
بی حیایه ائتدی
حملۀ مکرر
الحذر سسی چخدی گویلره
بیر شجاعتیلن
جنگ ایدوب او سرور
قدسیان گلوب نالیه دئدی
آفرین بو شصته
نامدار اباالفضل
دوندروب یولون نخلزاریدن
آتش قتاله
ویردیلر ادامه
ائتدیلر کمین هر ایکی الین
سالدیلار بدندن
یتدیلر مرامه
باخ همیّته باخ فتوّته
سعی ایدوب یتورسون
مشکی تا خیامه
قویمادی علم سرنگون اولا
دوتدی سینه سینده
پایدار اباالفضل
گه رکابدن بیر ایاقینی
ایلیوردی خالی
دشمنی یخاردی
گاهی ساغ طرف گاهی صول طرف
قان ایکی قولوندان
سو کیمی آخاردی
اول وفا شِیَم معدن کرم
حسرتیله مشکه
دمبدم باخاردی
سو یتورمگه خیمیه اولوب
تشنه لردن آرتوق
انتظار اباالفضل
فرصت ال ویروب اوخ آتانلارا
دورت مین اوخ قویولدی
چلۀ کمانه
یاغدیا وتسونه دورت طرفدن اوخ
شهپر آچدی اوخدان
فارس یگانه
مشگنون سویی خونِ دل کیمی
توپراقا توکولدی
رنگی دوندی قانه
خیمه سمتینون ترکین ایلدی
گوردی ئوز حیاتین
ناگوار اباالفضل
یوخ بدنده قول دشمن ال تاپوب
بیر تصور ایله
یوز ویرور نه حالت
بو مصیبتون شرح آخرین
قانه دوندی قلبیم
ائتمرم کتابت
یازدی «یحیوی» بو کلامینی
خاطرینده مکنون
نیت زیارت
آستانۀ پاکه یوز قویا
اولسا لطف اوزیله
یارکار اباالفضل
- جمعه
- 30
- آبان
- 1399
- ساعت
- 19:40
- نوشته شده توسط
- یوسف اکبری
- شاعر:
-
حاج عباسقلی یحیوی
ارسال دیدگاه