زینبیم گل آل الیمدن تشنه لب قربانی گتدیم
اللریم اوستونده امدی اصغریم پیکانی گتدیم
قزل قانه باتدی _ اوخا گولدی یاتدی
عهدیمی تکمیل ائدم بو دشتیده ائتدیم اراده
آلدیم آغوشه سوسوز قربانیمی گئتدیم جهاده
روبرو دوردوم سپاه اشقیائیلن مناده
قانیلن سیراب ائدوب بو غنچۀ خندانی گتدیم
قزل قانه باتدی _ اوخا گولدی یاتدی
دیلسیزیم گوردوم عطشدور ایستدیم سو اهرمندن
سو ایچوب آرام اولا شاید دئدیم رنج و مُحَندن
حرمله شرم ائتمدی اما نه خالقدن نه مندن
اوچ پر اوخ سالدی نفسدن آهوی زهرانی گتدیم
قزل قانه باتدی _ اوخا گولدی یاتدی
دست بیداد و جفادن ساغر صبریم جالاندی
اوخ دگوب حُلقوم اصغر لاله مثلی پارچالاندی
غنچۀ عمروم تالاندی اللریم قانه بویاندی
شیر خواریم اولدی سرّ عهدیمون عنوانی گتدیم
قزل قانه باتدی _ اوخا گولدی یاتدی
اوخ دگوب دیسکیندی فوراً گوزلرین آچدی ستارَم
بیر اوخا ائتدی تبسم بیر منه باخدی هزارم
سویلدیم یات دینجل اوغلوم دردووه بوخ آیری چارَم
صود امر قربانیمون چخدی الیمده جانی گتدیم
قزل قانه باتدی _ اوخا گولدی یاتدی
تیر صیاد جفادن آتش محنت اَلَندی
قول قنادی باغلی قوش تک دیلسیز اوغلوم یاره لندی
اوخ یریندن قان سوزولدی دوشلوگی قانه بلندی
اصغریم نوش ایلدی پیمانۀ پیمانی گتدیم
قزل قانه باتدی _ اوخا گولدی یاتدی
سالدی بو طفل نزارون اوچ پر اوخ حُلقینده لنگر
قول قناد ایستوردی چالسون اصغریم باغلیدی اللر
تیری چکدیم حنجریندن سسلدیم اللهُ اکبر
صحنۀ ایثاریمه شاهد دوتوب یزدانی گتدیم
قزل قانه باتدی _ اوخا گولدی یاتدی
زحمت عشقه دوزوب من ائتمدیم حاشا گلایه
ایلدیم تحفه تدارک ساحت قدس خدایه
قانینی اوجومدا دوتدوم شوقیلن سپدیم سمایه
شیر خوارون قانی اولدی عشقیمون برهانی زینب
قزل قانه باتدی _ اوخا گولدی یاتدی
یوخدی عشاقه مواسات عالمی اندازه عشقه
خون عاشقدور ویرر دنیا بوئی آوازه عشقه
منده خون اصغریمدن باغلادیم شیرازه عشقه
ئولدی شش ماهَم دیریلتدی پیکر قرآنی گتدیم
قزل قانه باتدی _ اوخا گولدی یاتدی
زینب ای زهرایه مظهر غم شریکیم انقلابه
عاشق صادق گرکدور صبر ائده جور و عتابه
گئت باجی وئر مژده الان خیمه ده بی کس ربابه
حاضر ائتسون گاهوارین صود امر قربانی گتدیم
قزل قانه باتدی _ اوخا گولدی یاتدی
- جمعه
- 30
- آبان
- 1399
- ساعت
- 19:48
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه