یا حسین عشقون سنون جاندان بلاگردان اولار
حُسنوون یک درصدی، صد دفتر و دیوان اولار
وار توان هانسی قلمده مدحتونده سوز قوشا
گوهر نایاب اولار ایتسون اشاره هر داشا
تیره تپراق جامهٔ اطلس گیَر باشدان باشا
اوندا که قرص قمر تک صورتون عریان اولار
چوخ نبی‌دن ایلیوب خلاق برتر شأنووی
ئوز وصیّت‌نامه‌سینده یازدی حیدر شأنووی
کاسه‌لیس نفسیدی، کیم گورمسه گر شأنووی
نفس طغیان ایلسه انسان دونر شیطان اولار
ای شهید بی کفن ای وارث شیر خدا
عشق زینب، مایه‌ی آرامش خیر النساء
روز محشرده اگرسن قوزاسون دست دعا
یدّی دوزخده نه اود وار سنبل و ریحان ولار
دست حکمت حسنوون پنهان ایدوب حتما چوخین
هانسی آیینه جمال حقّه وار سندن یوخین
صیده چیخسا گوزلرون ویرسه نشان مژگان اوخین
هر قدر خلقتده دل وار، سینه وار ویران اولار
مین سلیمان ال تاپانمز سنده کی شخصیته
سن او گُل سن ساچدیلار چادر نماز عصمته
پایلاسون شهد لبوندن بیر پیاله خلقته
خلق ایدر می توبه سی، بازار می ارزان اولار
سوز اگر عارف پسند اولسا آغاج تک بَر ویرر
ایچسه گر باران نیسانی صدف گوهر ویرر
بیر اوغول که عشق دانشنامه سین حیدر ویرر
شّکی یوخ سرتاسر جنّاته ده سلطان اولار
من او عطّارم که چکدیم هفت شهره آه دل
نایل ایلر عاشقی آماله بیلدیم راه دل
من گدایم یاحسین، سن مالک درگاه دل
کیم سنون پابوسون اولسا شامل احسان اولار
ای گوزل رخساری عشقون بی نقاب آیینه‌سی
سینه‌ی زهرا گلی، وی بوتراب آیینه‌سی
اولمیشام شبنم کیمی من آفتاب آیینه‌سی
بیر نظر سال، گورنجه شبنم دُر غلطان اولار
- یکشنبه
- 2
- آذر
- 1399
- ساعت
- 22:7
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه