نوبهار اولسا طبیعت گلشنه جان دولدورار
گول گولر گلزاری شاخ و برگ الوان دولدورار
باغ و بستان و چمن هر دم کماله سیر ائدر
گلشن و بستانی یکسر عطر رضوان دولدورار
گون سالار نورین یره یردن حرارت قوزانار
شوقدن ابر آغلیار دریانی باران دولدورار
خوش جمالین گوللرین شبنم بزکلر هرگئجه
صحن گلزاری کانه لعل و مرجان دولدورار
صبح اولاندا باغبان مدهوش اولار گلزاریده
روحینین پیمانه سین عطر گلستان دولدورار
باغبان با وفا خاری ائلر گولدن کنار
رشد ائدر گللر یرین در حد امکان دولدورار
باطراوت گللرین رخسارینه بلبل باخار
جام عشقین هر باخیشدا اول خوش الحان دولدورار
هی طواف ایلر اوخور پرواز ائدر گلدن گله
باغ و بستانی سرود وصل جانان دولدورار
آیریلیق یاددان چیخار بیلمز قاباقدا وار خزان
وقت پرقیمت لرین شاد و غزلخوان دولدورار
عیش و عشرتلن سئووار خوش گونلرین غافل هزار
خواب غفلت گوزلرین بیلمز که آسان دولدورار
طی اولار ایام شادی گل سولار گلزاریده
قلبینه باد مخالف درد هجران دولدورار
فصل سرماده اونین اولماز یتن فریادینه
سینه ی پر محنتین سوز زمستان دولدورار
جامه ی عیش و نشاطین سویدورار چرخ فلک
زندگی گلزارینه آفات و خسران دولدورار
بلبلین بو غفلتی بیر درس عبرتدی بیزه
مخزن افکارینی عبرتله انسان دولدورار
منطق اهلی خوشدی درس آلسون تلاش نملدن
گور نجه پیمانه ی فکرین او حیوان دولدورار
یاز گونی ایشلر قاریشقا جمع ائده آذوقه سین
چون معاش اوسته تلاشین امر بحران دولدورار
نفسه تسلیم ایلمز عقل و شعور و منطقین
روز و شب انبانینه آذوقه هر آن دولدورار
قیش گلنده ایلمز شاختا کولکدن واهمه
اعتنا ائتمز یر اوستین برف و باران دولدورار
باغلیار اوچ آی قیشی دروازه ی درد و غمی
استراحت بسترین شاد و خرامان دولدورار
ای بشر بلبل کیمی اولما عبث عشرت طلب
عیش و نوش اهلین جهیمه قهر منان دولدورار
دوشمه بو فانی جهانین دامینه بلبل کیمی
ساغر آمالووه وار عادتی قان دولدورار
بلبل و گلزاره باخ آخر فلک گورنیلیور
اهل معنا عقلینی در حد میزان دولدورار
بیر طریقتدی بونی تحریر ائدوب کلک ازل
هر کسین پیمانه سین اوز فکری آسان دولدورار
کیم آچا چشم بصیرت تابع توحید اولار
قلبینون آئینه سین انوار ایمان دولدورار
نقد جان الده گزر بازار عشقی روز و شب
خوی و خون و استخوانین شوق جانان دولدورار
عقل اوزیلن اوز خیالین قرب اعلایه چکر
مخزن افکارینی اسرار عرفان دولدورار
عقلدن فرمان آلوب نفسین ذلیل و خوار ائدر
ماه و سال اوقاتینی تسبیح سبحان دولدورار
غافل انسانلار کیمی آتما عبادت لذتین
غافل اولسون گوزلرون تصویر شیطان دولدورار
هی وئرر رذل و ضلالت باده سین شیطان سنه
آخرت ملکینده جسمون نار نیران دولدورار
بیز ولایت اهلی اما آلمشوخ درس وفا
بیزلرین پیمانه سین شاه شهیدان دولدورار
شیعه لر چون دل وئروب باشدان گچن مولاسینه
مکتب عشقی او دور عاشقلر هرآن دولدورار
مکتبی که آرمانی ایتدی دینی سربلند
حشره تک آوازه سین آفاقه دوران دولدورار
ایلده اون گون بزم ماتمده حسینیم وای سسی
عرشه قالخار گوزلری اشک فراوان دولدورار
یاد ائدن وقته حسینین بی نظیر ایثارینی
عشق دریاسینده قلبی موج طوفان دولدورار
قوی اشاره ایلیوم شاه شهیدان نیلیوب
مطلبی روشن دئسم گر قلبیوی قان دولدورار
روز عاشور محرم زینبین آغلار گونی
بیر گونی که عالمی آهیله افغان دولدورار
غم طریقیلن حسین تفسیر قرآن باشلادی
عترته آندیردی قلبین آه سوزان دولدورار
شرح ائدوب ذبح آیه سین قرآن ناطق نطقیلن
ظهر عاشورا دئدی میدانی آلقان دولدورار
آیه آیه شرح ائدوب آیاتی آخر سویلدی
جسمیمی اسلامه خاطر تیر و پیکان دولدورار
من اگر قانه باتام دین و شریعت حفظ اولار
مکتب توحیدیمی مخلص مسلمان دولدورار
عزم ائدون بیر بیر جهاده عون و فضل و اکبریم
سیز شهید اولسوز بلی دنیانی قرآن دولدورار
گر کفایت ایتمسه اثبات حقیمده قانوز
خون عباسیله خون طفل عطشان دولدورار
الغرض گوندردی میدانه حسین قربانلارین
رسمدی قربانگه عشاقی قربان دولدورار
"زعفرا" آلسون حسینون مکتبیندن درس عشق
قبریوی نوریله سلطان شهیدان دولدورار
- یکشنبه
- 2
- آذر
- 1399
- ساعت
- 22:9
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه