حجاب اولوبدی محجب حجاب زینبدن
دوشوبدی غنچه تب عشقه تاب زینبدن
یالاندی کیم دئسه زینب قالوبدی بی معجر
حجاب درسی آلوب احتجاب زینبدن
نه شمره نه عمره نه سنانه یالواردی
وقار درسیدی خلقه کتاب زینبدن
خراج چین و ختندن آلوبدی آغ زلفی
اولوبدی مشگ مثل مشگناب زینبدن
اولوبدی چشم فلک کور ایستیوبدی باخا
چو آفتاب کنار نقاب زینبدن
سالوبدی معجر نیلی عذاره نیلوفر
ایدوبدی یا تبعیت ثیاب زینبدن
چکوبدی گون یوزونه پرده ابردن اوتانوب
تنور ایچینده یاتان آفتاب زینبدن
گورنده قارداشینی نیزه ده اوخور قرآن
دوشوب تبه بالالار پیچ و تاب زینبدن
دیدی حسین اوخی قران باجون فدا دیلیوه
که حق سوزی ایشیدیلسون رکاب زینبدن
یاتوب بو جامعه ظلمیله خواب غفلتده
قولاق دوتوبدولا بانگ رباب زینبدن
کلام حقیله تبلیغ حق قیل باری
نظر بودور بو دیاره ایاب زینبدن
ورولسا آنیوا داش منده باشیمی یارام
سینار باشیم سینا گر پر عقاب زینبدن
ولیک سینمه تا قویموسان کسیلمیش الون
دوشوبدی حیرته ایوب تاب زینبدن
اودور باشون هارا گتسه اونیلا من گيدرم
که سیر عشق اولونا بو ذهاب زینبدن
مریض امامی عدو ایلیوبدی بند رسن
او علته یاغوری قان سحاب زینبدن
وراندا باشیوه داش نخلدن بو کوفه لیلر
نولار که دگسه بو قلب کباب زینبدن
یارالی باشیله بزم عبیده گل یارالی
ایشیت سئوال عبیده جواب زینبدن
آتام علی کیمی بیر خطبه ایلینده خطاب
دوشر تشنجه عالم خطاب زینبدن
اودور که شامیده قارداش گورن کیمی دیه جاق
که احتذار ایلیون سیز عتاب زینبدن
اولوبدی منقلب عالم یخیلدی کاخ ستم
دیار کوفه ده کی انقلاب زینبدن
اودور گیدنده باشون مجلس یزیده حسین
قولونا اتمه تعجب طناب زینبدن
اولاندا لعل لبون چوب خیزرانه هدف
ایچر سو نخل خدا اشگناب زینبدن
کنیز ایستسه لر گر عفیفه قیزلاریوی
هامی تعجب ایدر اجتناب زینبدن
گلر شجاعتیمه دشمنونده تحسینه
اولالا سرزده لحن عجاب زینبدن
او یرده مکتب حق فتح باب ایدوب گللم
تاپار سعادت عدو فتح باب زینبدن
اودور رقیه نی ویرانه ده دفن ایدرم
حفاظت ایلیه کوی خراب زینبدن
یازاندا (هادی) اونون مدحینی منیم ده یازار
که بیر ورق دی رقیه کتاب زینبدن
- سه شنبه
- 4
- آذر
- 1399
- ساعت
- 14:3
- نوشته شده توسط
- یوسف اکبری
ارسال دیدگاه