ای نگار بزم وحدت دیده گریان گلمیشم
ماه غفراندور گناهیمدن پشیمان گلمیشم
چوخ چتین گونلر کئچوب سنسیز بو یورقون بنده وه
پشت سرده قویموشام وحشتلی طوفان گلمیشم
سن وئرن پاکیزه روحی ئولدوروب دفن ائتمیشم
دست خالی ٬ ورشکسته٬ غرق عصیان گلمیشم
گورمیشم ئوز چهره می آیینه ی عرفانیده
قورخمیشام وحشتلی چهره مدن هراسان گلمیشم
یا رجاء الخائفین من ئوز الیمدن قاچمیشام
سیندیروبدور نور قرآن قفل زندان گلمیشم
حرمت مهمانی واجب ایلیوبسن سن ئوزون
الده دعوتنامه بزم عشقه مهمان گلمیشم
قانی قانیلن یومازلار عفو ائله اغماض ائله
فکر ائله نادانلیقیمدان ایلیوب قان گلمیشم
خالصانه ٬ عاشقانه٬ بی ریا٬ ثابت قدم
چکمیشم روح نفاقه خط بطلان گلمیشم
ئولم اما وئرمرم الدن سنون دامانوی
محضر جانانیمه الده دوتوب جان گلمیشم
وئر سر وسامان پریشان قلبیمی آباد ائله
منزل معمار عشقه نابسامان گلمیشم
شکر اولا ایتمیشدیم اما عاقبت تاپدیم یولی
جذبه ی عشقون چکوب افتان وخیزان گلمیشم
گلمیشم شاید غلط سوزدور ئوزون گتدون منی
نابجادور محضرونده اولسا عنوان گلمیشم
چونکه سن غفارسن لطف ایلدون « غفاریه»
شوقیدن درگاه حقه اشک ریزان گلمیشم
- جمعه
- 7
- آذر
- 1399
- ساعت
- 19:58
- نوشته شده توسط
- یوسف اکبری
- شاعر:
-
استاد حسین غفاری اردبیلی
ارسال دیدگاه