گوره سن گر منی عریان گینه صبر ایله باجی
اولموشام قانیمه غلطان گینه صبر ایله باجی
یازیلیب لوح بلاده منه ئولماق سنه صبر
حق یولوندا گرک ایتماخ ستم دشمنه صبر
باخ ولی ایله باخان وقته بو پیراهنه صبر
که اولور پارهٔ پیکان گینه صبر ایله باجی
نقش صبریله گرک سینوی منقوش ایده سن
نقد جانیله جفا جامین آلیب نوش ایده سن
کعبه قبریده گر یتسه فراموش ایده سن
زحمت خار مغیلان گینه صبر ایله باجی
نجه کی وقت خزان شور دل بلبل اولور
مهربان باجیا قارداش ئولومی نسگیل اولور
سینمیا بیله کمک سیز قالا چوخ نسگیل اولور
سهل دور جان ورم عطشان گینه صبر ایله باجی
باجی بو عرصده من ظلمیله قانه باتارام
قانیمی اکبریمین قانینه آخر قاتارام
خاک وخون ایچره دوشوب شوقیله راحت یاتارام
اولورام خاکیله یکسان گینه صبر ایله باجی
زینبیم آغلاما چوخ تاب ایله گلمه دله سن
ویر رضا امر قضایه باجی ایتمه گله سن
دستهٔ درد و غم و محنته سرسلسله سن
شام شومه کیمی اولسان گینه صبر ایله باجی
فوت اولور وقت شهادت یتیشوب حکم قضا
ال گوتور تا که گیدوم ایمدی خداحافظ اولا
من گیدندن صورا بو سن باجی بو دشت بلا
خیمه گاهون اولا سوزان گینه صبر ایله باجی
قتلگاه ایچره گورنده بو حسین قارداشوی
زینبیم آغلاسان آغلا یوزه توک گوز یاشوی
آچما اما باجی دشمنلر ایچینده باشوی
زلفوی ایلمه افشان گینه صبر ایله باجی
ئولدورللر منی ایلله سنی ناقه سوار
شام شومه آپارور شمر لعین طرفه قطار
آل طاهانی گوررسن کی اولور خرد و کبار
سینه سوزان و پریشان گینه صبر ایله باجی
چکه‌جاق دور فلک جمله گذرگاهه سنی
دستگیر ایلیه جاق دشمن بد خواهه سنی
تاپشورورام سنه اطفالیمی اللهه سنی
سنسن امید یتیمان گینه صبر ایله باجی
جان سنون جان منیم اطفالیمون ای جان عزیز
جان ویرندن صورا من اودلاناسوز آتشه سیز
ووراجاق قوم عدو ایلسوز اول وقته گریز
جانب دشت بیابان گینه صبر ایله باجی
سن گرک عابد بیماره پرستار اولاسان
غم گونی لیلی غم پروره غمخوار اولاسان
خیردا اطفالیمه شام ایچره هوادار اولاسان
چکه سن رنج فراوان گینه صبر ایله باجی
کوچه و بامیده صف صف دورا گر قوم عنید
منی ئولدورماق ایچون ایلیه‌لر عشرت و عید
خیزران چوبی آلاندا اله ظلمیله یزید
اولا منظور بو دندان گینه صبر ایله باجی
(هندی) روسیه‌هون واردی زیارت هوسی
کربلاده وار امیدی اولا آخر نفسی
دیه بو وردی چیخا صفحهٔ افلاکه سسی
گوره‌سن گر منی عریان گینه صبر ایله باجی
- جمعه
- 7
- آذر
- 1399
- ساعت
- 20:13
- نوشته شده توسط
- یوسف اکبری
- شاعر:
-
مرحوم هندی تبریزی
ارسال دیدگاه