او دم آچوب بالاجا اَللرین دعایهَ حسین
که قُرب حقه مقرب او ماه سیمادی
حسین دعا ایدوری بیر باخون جلالتینه
دییَن دعاسینه آمین علی اعلادی
مگر دعا قئیدر پنج تن اولان ایودن
بتولدور حسنیندی علی دی طاهادی
گوروبله میل غذا ایتموری گنه شه دین
بیلوبله مقصدینی دیلده نَه تمنادی
حسینون اَول اروج دوتماقیدی عالمده
عطا اولوندی نئچه پر بها هدایادی
بویوردی جدی پیمبر بهشتده کوثر
منیمدی ویردیم اوغول من سنه او اسنادی
علی بویوردی پیمبر منه ویرن باغی
سنه عطا ایلدیم من او باغ آبادی
حسن دیدی کسرم منده جنتین قاپوسین
اوگونکه خلق اوچون شورِحشر برپادی
بهشته شیعه لرون گِتمینجه گِتمز حسن
بو گونده عهد او گونده زمان ایفادی
بویوردی فاطمه من یر یوزونده کی سولاری
بغشلدیم سنه مهریه دن عطایادی
گَلوب او حالدهَ روح الامین عرض ایلدی
حسین خادمیم من منه او مولادی
منیمده ایستورم اولسون بو بارده حقیم
که شاهه نوکر ایده جان فدا بو حسنادی
نقدر ایمدیه دین ایتمشم عبادتلر
حسینه بذل اِیلدیم موقع تقلادی
خدا بویوردی حبیبیم، منه دوتوبدی اروج
جزای صوم منم اجر مندن اولادی
نقدر شیعه لری دوتسالار اروج دیمیشم
قبول اِیدم که حسین دردینه مداوادی
جزادهَ شیعه لرینده بغشلرم او قدر
رضایتی اَله گَلسون شفیعِ عقبادی
آناسی قارداشی جدی آتاسی راضی اولا
منیمده حکمیم حسینون اَلیله امضادی
ویروبدی درسینی استادِ عشق اولدن
که قرب حقده شأن و جلالی عظمادی
ویروب بو حالیله سر مشق عالمه یعنی
عبادت اِیله‌مین حقیدن مبرادی
اروج مَتاعی قویولودی یِرهَ باخون عشقه
ساتان حسین آلان الله غریبه سودادی
دوتوبدی بیردهَ اروج دشتِ کربلاده حسین
او گون حرارتین آرتیردی گون نَه معنادی
اوزی یارالی سوسوز ایستی قوملارین اوستی
گِیدوب کمکلری اَلدن غریب و تنهادی
دوشوبدی قان آرا یالقوز هرایه یوخ یتنی
تمام دور و بریندهَ سپاه اعدادی
قلج ویران اوخ آتان بیربیره اِیدور سبقت
حسیندی بیر اِیله لشکردی قانلو صحرادی
باخوردی خیردا اوشاقلار خیامدن یکسر
دیوبله بیر یارالی اوسته گور نَه دعوادی
دَگوبدی بیر بیرهَ عالم اَسوب قَرا یِللر
آناسی فاطمه نون ذکری وا حسینادی
قلم اود آلدی داخی ( اعظمی ) تمام اِیله
شرارِ محنت و غم یاندیرار بو اکبادی
- دوشنبه
- 10
- آذر
- 1399
- ساعت
- 22:51
- نوشته شده توسط
- یوسف اکبری
ارسال دیدگاه