باغریم بیر عمر دور بولوسن قاندی یاحسین
غم آتشينده خسته گوگل یاندی یاحسین
دریای غمده یوز ویروری غصه و ملال
قورخوم بودی اجل يتيشه ورمیه مجال
شش گوشه قبریوی منه گورماق اولوب محال
-موج سرشگ دردیمه عنواندی یاحسین
ای معدن کرامت و وی منبع سخا
بایرام اولاندا نوکره شهلر ایدر عطا
کم لطف سن ندن بیزه ای حجت خدا
حسرتدیم مزاریوه چوخداندی یاحسین
گرد خطانی اشگیله دلدن سیلنمورم
علت ندور او قبریوه شاها گلنمورم
سندن سوای درده معالج بولنمورم
آچماق بو مشکلی سنه آساندی یاحسین
بیر مدّت عمریدی گوزیمی تکمیشم سنه
هر وقفه لر آخار گوزیمون یاشی دامنه
باعث اولوبدی معصیتیم باخموسان منه
بیر عمر گوزلریم اودی گریاندی یاحسین
بیجا دگل گوزیم یاشی رخساریمه آخار
آهیم بیر اود ویرار دل سوزانیمی یاخار
شهلر همیشه نوکرینه رسمیدی باخار
بیر باخماقون بو دردیمه درماندی یاحسین
من چکمرم ئولنجه سنون دامندن ال
آرزوم بودور هاچان منی درک ایلسه اجل
تک قویما جان ویرنده اوزون باشیم اوسته گل
الحق او گلماقون منه احساندی یا حسین
مدتی نوکرم سیزه ای شاه ممتحن
خادم آدیله بوینوما من سالمیشام رَسَن
جان تاپشوراندا بیرجه منه نوکریم دیسن
بو رتبه خاک پایوزه احساندی یاحسین
گوزده مجسم ایلرم اول پاک مدفنی
دلدن او دور که آرتورارام داد و شیونی
گوزدن یقین بو مدّتی سن سالموسان منی
هجران اودوندا باغریم اودور قاندی یاحسین
قالمور او قدری کاسه دل قانیلن دولا
بادغميله گلشن عیش دلیم سولا
سن سن او شه که سائلی بوش سالماسان یولا
عالم سنون او جوديوه حیراندی یاحسین
بیر عمر من قاپوندا سنون وُورموشام قدم
وار سنده بیر امیدیم ایا شاه محتشم
گل سنده سالما بوش يولا ای منبع کرم
درد دليم نه مدّتی پنهاندی یاحسین
آگاهسن بو امره منیم وار نه نیّتیم
چوخ آرزو ایدردیم اولا بلکه قسمتیم
چارم ندی اورکده منیم قالدی حسرتیم
نسگلدی یوارون گینه باغلاندی یاحسین
عشقونده گوز یاشیم آخا مشگلدی من سیلم
باعث اولا گوزیم یاشی تا قبریوه گلم
خوشدور اجل يولوندا منی درک ایده ئولم
جانیم او قبر پايوه قرباندی یاحسین
- دوشنبه
- 10
- آذر
- 1399
- ساعت
- 23:1
- نوشته شده توسط
- یوسف اکبری
- شاعر:
-
مرحوم نادری میانجی
ارسال دیدگاه