بار الهی لطف قیل توفیق طاعت وئر منه
سایۀ لطفونده تشریف اقامت وئر منه
نفس سرکش ایستییر ائتسین منی یارب هلاک
نفسی مغلوب ائتمگه بیر قوت و قوّت وئر منه
قیل ترحّم اولماییم رحمت آییندان بی نصیب
بو صفالی آیدا توفیق عبادت وئر منه
چشمه سار معرفتدن قلبیمی سرشار قیل
معصیت لردن بری ائت صدق نیت وئر منه
کعبۀ کوینده یارب ائت منی ثابت قدم
وادی سلم و رضا ده استقامت وئر منه
زهر قیل کامیمدا آلسام غیر الیندن شهد ناب
اوز زلال رحمتوندن بیر حلاوت وئر منه
باش اگم قیلما روا اغیاره بیر دم دهرده
طبعیمی سرشار قیل یارب مناعت وئر منه
سرد قیل نفسین اودون ای ناری گلزار ایلیین
گرم قیل عشق آتشین شور حرارت وئر منه
گلدی یارب خسته جانیم تنگه قیل و قال دن
بو هیاهودن اوزاق کنج فراغت وئر منه
ای سلیمانلار قاپوندا ایلیین اظهارعجز
بینوایم بی پناهم گنج دولت وئر منه
تا نصیب اولسون بو عاصی روحه حسن عاقبت
آل بو برگ موتیمی قبض شهادت وئر منه
چولقاییبدیر دورت جهتدن خوی حیوانی منی
آل بو خوی پستی خوی آدمیّت وئر منه
بو غبار آلوده گون لردن منی ایله خلاص
تا تاپام یول وادی حقّه بصیرت وئر منه
تخت استغناده قوی تاج کرامت باشیما
کنج ملک فقرده گنج قناعت وئر منه
- دوشنبه
- 10
- آذر
- 1399
- ساعت
- 23:15
- نوشته شده توسط
- یوسف اکبری
- شاعر:
-
علی شهودی
ارسال دیدگاه