گدای شهر غمم شهریاری آختاریرام
قدم قدم دولانوب کوی یاری آختاریرام
تبار حضرت خورشیده قوشموشام ئوزومی
حبیب و حر کیمین اعتباری آختاریرام
یاپیشمیشام ایکی اَللی مَلک ئوپن اَتگی
حسین حسین دئیوب اوج وقاری آختاریرام
مسیح عشقیمه وقف ایتمیشم جوانلیقیمی
بلایه مشتریم چوبِ داری آختاریرام
قطار مرثیه نون منده بیر مسافریم
قلم الیمده ره افتخاری آختاریرام
ردیف و قافیه قیدینده قالمارام هرگز
یازاندا نوحه ، نگاه نگاری آختاریرام
فرشته شهپری اوسته بهشته گئتسم اگر
گورن منی بیلر آیری دیاری آختاریرام
سوروشسالار هارانی آختارور گوزون دئیرم
من آلتی گوشه اولان بیر مزاری اختاریرام
گوزوم فدا او مزاره نفس باتوب اوردا
ایکی اوغول بیر آتا ، بی کفن یاتوب اوردا
او یرده دفن اولوب اسرار ناب عاشورا
او یرده معنی تاپوب انقلاب عاشورا
او یرده عشق بساطین قوروب ، یاریم گونده
ساتوب ستاره لرین آفتاب عاشورا
او یرده نیزه لر آلتیندا بیر چوخور یرده
ورق ورق داغیلوبدور کتاب عاشورا
همان کتابه باخوب یولدی ساچلارین زینب
دئدی بو ساچلار اولار رختخواب عاشورا
مگر من ئولموشم عریان یاتوبسان آی قارداش
وجودوی بوریوب التهاب عاشورا
سنی رقیه اوتانما بورون بو ساچلاریما
اجازه وار منیم اولسون ثواب عاشورا
اولوبدی میکدۀ عشق قانلی قتلگهون
آخور کسوک بوغازیندان شراب عاشورا
گرک یاخام بو مقدّس شرابی معجریمه
کی تا ابد تاپا قیمت حجاب عاشورا
من اول گلم کی نجابت یاغار گلابیمدن
الیم کسیلسه ده ال چکمرم حجابیمدن
خوشا سعادتیمه سروریم حسین سن سن
سرای عشقیده همسنگریم حسین سن سن
غزل یاغار نفسیمدن دلینده پاک آدیوی
شکسته بیر قلمم جوهریم حسین سن سن
سویولموشام ولی صراف گنج توحیدم
واریم الهیدی ، سیم و زریم حسین سن سن
دلیلی وار اتگیمدن ئوپر سلیمانلار
چون عاشقم سنه ، تاج سریم حسین سن سن
دیل آچمامیش بو سوزی دیلده ازبر ائلمیشم
منیم قیامته جک ، دلبریم حسین سن سن
محالیدور داغیدا کشتی وجودیمی غم
چون اللی ایلدی منیم لنگریم حسین سن سن
قدم آچوب اوچارام جبرئیل اوچان یرده
وقاریلن دئیرم شهپریم حسین سن سن
خلیل اولوب یانارام عشق اودوندا تا گوره سن
پریم کی سهلیدی ، خاکستریم حسین سن سن
قسم وقارووه شأن و وقاریم اسکیلمز
رشیده قدیمی غم بوکمیوب بوکه بیلمز
شراب عشقی ایچوب جانه گلمیشم یارالی
بو قانلی مقتله مستانه گلمیشم یارالی
قوناقوام منه خوش گلدون ائتمون ئوللم
امیدیلن بو بیابانه گلمیشم یارالی
ایاقه دور ائویمی یخما ، در به در باجوام
چوخاتما دردیمی درمانه گلمیشم یارالی
ائشیتجگین قوجا یعقوبیمین الهی سسین
گوزومده گوز یاشی کنعانه گلمیشم یارالی
ایاق یالین ، الی قوینوندا ، انمیشم تلی
خدا بیلور نجه میدانه گلمیشم یارالی
سورونموشم سنی آتلار ایاقلیان یرده
بو قتلگاهه غریبانه گلمیشم یارالی
دولانمیشام باش آچیق هی جنازوین باشینا
طواف شمع شبستانه گلمیشم یارالی
بوغازوین یاراسین گه اوپوب گه ئیله میشم
ننمون عطرین آلوب جانه گلمیشم یارالی
سنی بو حالیده گورمیدی زینبون ای کاش
ایاقلانان گوله بنذور جنازون آی قارداش
سالوب وجودوی صیاد غم کمنده حسین
سسون باتوب سینوه نیزه لر اننده حسین
گونون باتان چاقی شیرازه دن چیخوب بدنون
همان بدنکی اسور ایندی یل اسنده حسین
جهاندا هئچ بیر ئولن سن کیمین غریب ئولمز
حسن کیمی کاش اولیدون وطنده سنده حسین
چیخیدی گوزلریم ای کاش کور اولیدیم من
جدا باشیندا کسیک باشیوی گورنده حسین
یانوندا من واریدیم قانلی قتلگاهونده
بوغازوین دامارین شمر دون کسنده حسین
یالین الیله یالین خنجری یاپیشدیم من
سنون کیمین یارالاندیم بو چولده منده حسین
دئدیم گرک بو منایه منیمده قانیم آخا
گوره بو قانی ننم مقتله گلنده حسین
بیله کی شیرهٔ جانی نه شیرزن بجروب
منیده یاده سالا اوخشاما دئنده حسین
آماندی قاسمی باش قوشما فانی احزابه
تمام هستیوی وقف ائت حسین تک اربابه
- سه شنبه
- 11
- آذر
- 1399
- ساعت
- 23:7
- نوشته شده توسط
- یوسف اکبری
- شاعر:
-
بهزاد قاسمی اردبیلی
ابراهیمی