رقیه دختر شاه شهیدان
مدال سینه سلطان خوبان
سپهر عصمته ماه درخشان
او آزسینیله اولدی فخر نسوان
مقام و منصبی شایان رقیه
دوای درد بی درمان رقیه
اوزی محبوبه اهل جهاندی
آدی ورد لب پیروجواندی
سرور سینه افلاکیاندی
رقیه عمه صاحب زماندی
عزیز عالم امکان رقیه
دوای درد بی درمان رقیه
رقیه خانه دینین سراجی
شرفدی کعبه عشقه بوحاجی
علی اکبره ایستکلی باجی
چاغیر گلسین مریض لا علاجی
ائدرهر مشکلی آسان رقیه
دوای درد بی درمان رقیه
آتا قدرتده مشهور جهاندی
عموسی جنگیده شیر ژیاندی
اوزی اوچ یاشدا اما قهرماندی
یزیدین قصرینه لرزه سالاندی
یاراتدی شامیده طوفان رقیه
دوای درد بی درمان رقیه
اونون اذهانیدن اوصافی خارج
همیشه سکه بازاری رایج
کیچیک زهرا لقب باب الحوائج
خلوصیله گل آل یاخشی نتایج
ائدر چون لطف بی پایان رقیه
دوای درد بی درمان رقیه
دلیلی وار باشی عرشه اوجالدی
حیا درسین خانیم زینبدن آلدی
اگرچه اوچ یاشیندیدی قوجالدی
ولیکن تختیدن ظلامی سالدی
حسینه اولدی هم پیمان رقیه
دوای درد بی درمان رقیه
مدار عشقیده آیدین ستاره
چاتان اوج وقار و اعتباره
گلستان غمه یورقون قناره
گجه زهرا کیمی گئتدی مزاره
اسیر دشمن نادان رقیه
دوای درد بی درمان رقیه
بوقیز خوان امامتده نمکدی
گل ناز گلستان فدکدی
بی بی سی زینبه دائم کمکدی
اولوب قارداشلاری قاره لچکدی
اورگی غصه دن شان شان رقیه
دوای درد بی درمان رقیه
یوخودا بیر گجه گوردی باباسین
اوجاتدی عرش اعلایه نواسین
یامان حالتده تاپدی آشناسین
گوروب ناگه باشیندا داش یاراسین
دوباره اولدی نوحه خوان رقیه
دوای درد بی درمان رقیه
دئدی ای درده درمان کربلاسی
اولان ای رشک جنت نینواسی
بو باشین بس قالوب سالم هاراسی
گوزل آلنوندا واردی داش یاراسی
جمالونده گورور القان رقیه
دوای درد بی درمان رقیه
یریم بابا نظر سال گور هارادی
قراساچیم کیمی بختیم قرادی
ساچیمی شانه محنت دارادی
تیکان باتوب ایاقلاریم یارادی
یانار آغلار بو سرگردان رقیه
دوای درد بی درمان رقیه
اولوبدی قاره بختینن گیلیلی
قزیوون یوخ داخی دنیایه میلی
یوزومه ویردیلار یولارداسیلی
یوزوم زهرا آنام تک اولدی نیلی
اولوب مظلومه دوران رقیه
دوای درد بی درمان رقیه
دونوبدی غصه دن قلبیم کبابه
دچارم درد بی حدو حسابه
ستمله باغلادیلار بیر طنابه
آپاردیلار بیزی بزم شرابه
نجه بس اولماسین نالان رقیه
دوای درد بی درمان رقیه
نه حاله گور منی دوران سالوبدی
داشا آئینه ی وقری چالوبدی
بوغم آرامیمی الدن آلوبدی
علی اکبر منی گوزدن سالوبدی
اولار حشره کیمی گریان رقیه
دوای درد بی درمان رقیه
- چهارشنبه
- 12
- آذر
- 1399
- ساعت
- 22:35
- نوشته شده توسط
- یوسف اکبری
- شاعر:
-
حاج روح الله رمضانی
ارسال دیدگاه