رحم ایله اوزون امت پیغمبره یارب
بو خلق دوشوب آهو کیمی چوللره یارب
هرچند گنهكاروق ایا خالق سبحان
بذل کرمونله بیزیله ائتگیله دیوان
قورتار بو بلادن بیزی ای راحم رحمان
وئرّوخ سنی سوگند علی اکبره یارب
هر قدر بلا اولسا سزاواروخ الهی
سوز یوخدی که بیز جمله گنه کاروخ الهی
بیز شاه شهیدانه عزاداروخ الهی
باغیشلا بیزی اول شه بی لشگره یارب
یوخ بیزده او طاقت که دوزاخ بیله بلایه
عفو ایله بیزی پادشه کرب و بلایه
آلدى الینه اصغری یوز دوتدی سمایه
سو وئرمدیله تشنه علی اصغره یارب
بیز امت عاصیلری قرآنه باغیشلا
سلطان نجف اول شه مردانه باغیشلا
بو گوزیاشی بو ناله و افغانه باغیشلا
سال بیر نظر لطفیوی بیز مضطره یارب
درگاهیوه یوز دوتمیشوخ ای قادر فخّار
بو چنگ «وبادن» بیزِ عاجزلری قورتار
عفو ایله الهی به حق سیّد ابرار
بیر امن عطا ائت گینه سن بیزلره یارب
بو غمده باتوب جملۀ ذرات ملاله
مخلوق دگوب بیر بیرینه ایلیری ناله
بیر کرب وبلانی سالون ای شیعه خیاله
یتدی نه ستملر شه دین پروره یارب
بیر آنیده دوغراندی اونون یدّی جوانی
داماد الینه طوى گئجه سی یاخدیلا قانی
سالدی باشینا قاره عروس ائتدی فغانی
بخش ایله بیزی سن او قرا معجره یارب
ئولدوردیله او شاهین علمدارینی تشنه
سالدیلا اونون هر ایکی قوللارینی تشنه
قیردیلا اونون یاور و انصارینی تشنه
سو وئرمدیلر نور دل حیدره یارب
دویمادیلا بو ظلمدن اول قوم شقاوت
ائتدیله اونون خیمه و خرگاهینی غارت
اول زینب بیچاره نی یاندیردی بو محنت
بیمارینی یاندیردیلا چون آذره یارب
هر کیم توکه گوز یاشینی بو بزم عزاده
بی شک یتیشور اجری اونون روز جزاده
«دلریش» نقدر وار نفسون ایله اراده
وِرد ائت بو سوزی “رحم ایله سن بیزلره یارب”
- چهارشنبه
- 12
- آذر
- 1399
- ساعت
- 22:40
- نوشته شده توسط
- یوسف اکبری
- شاعر:
-
مرحوم مشهدی اصغر دلریش
ارسال دیدگاه