خلاق عالمم ایکی دنیا یاراتمیشام
هفت آسمان و عرش معلی یاراتمیشام
آفاقه زینت ایلمیشم کهکشانلاری
شمس و قمر، ثری و ثریا یاراتمیشام
کافرلریله آیریدی مؤمن لرین یری
من دوزخیله، جنت العلی یاراتمیشام
کیم ائدسه اخذ معرفت اسراری کشف ائدر
ئوز خلقتیمده گور نه معما یاراتمیشام
حکمت واریدی نسل بشر گلدی عالمه
آب و گلیله، آدم و حوا یاراتمیشام
یوسف گوزلدی، خوش سسی داوده وئرمیشم
یعقوب و نوحیله، ذکریا یاراتمیشام
دریاده بطن ماهی ده یونس تاپار پناه
باشی بدندن آیریلا یحیی یاراتمیشام
عزرائیلی یاراتدوم آلا انسانین جانین
احیا ائده ئولنلری عیسی یاراتمیشام
انجیلی هدیه وئرمیشم عیسی ابن مریمه
توراته صاحب اولماقا موسی یاراتمیشام
متن صحف که حضرت ابراهیمین کی دور
متن زبوری مملؤ معنا یاراتمیشام
کامل ترین کتابیدی قرآن منیم کیدور
ناشر اولا بو مصحفه طاها یاراتمیشام
فوج ملک جلالیده چاتماز محمده
من خاتم پیمبری والا یاراتمیشام
گتدیم وجوده عالمی پیغمبره گوره
علت بودور کی طارم خضرا یاراتمیشام
خلق ایلدیم پیمبری ده، حیدره گوره
عالم لره علی کیمی مولا یاراتمیشام
مولای ماخلق دی علی باوقاریدی
شوکتده مرتضانی معلی یاراتمیشام
زیبا وجودی خلقتیمه افتخاریدی
هر عیبیدن علینی مُبرّیٰ یاراتمیشام
مشتق اولوب منیم ئوز آدیمدان علی آدی
من عالی ام، علینیده اعلی یاراتمیشام
هر کیم علی جمالینه باخسا منی گورر
ئوز جلوه می علیده هویدا یاراتمیشام
حقه ولی دی، شاه ولا روح قبله دی
شأن علینی کعبه دن اولیٰ یاراتمیشام
من کعبه نی یاراتدیم اونا زادگاه اولا
بیت الحرامی حیدره مأوا یاراتمیشام
صولتده بی نظیریدی، قدرتده بی بدیل
من هر جهتده حیدری تنها یاراتمیشام
بیرده یاراتمارام من علی مثلی شهریار
شیرخدانی شاه توانا یاراتمیشام
نام علی زبوریده اریادی، هکذا
توراتیده علی آدین الیا یاراتمیشام
رضوانیده امینیدی، قرآنیده علی
انجیل ده نام حیدری بریا یاراتمیشام
ختم الرسل محمده ، ساقی کوثری
یار و حبیب لیلة الاسرا یاراتمیشام
پیوند اولا گرکدی امامت، رسالته
طاهایه جانشین تعالیٰ یاراتمیشام
نه مصطفانی خلق ایلیردیم نه حیدری
دنیانی من بخاطر زهرا یاراتمیشام
زهرا کیمی بشر داخی گلمز بو عالمه
زهرانی من ئوزیم کیمی یکتا یاراتمیشام
دنیا هاموسی بیر یانا زهراده بیر یانا
الحق بو خلقتیمده کی غوغا یاراتمیشام
کان حیادی اوج نجابت هماسیدی
باغ شرفده بیر گل رعنا یاراتمیشام
زهرا آدی گلنده ملک لر قیام ائدر
درگاهینه کنیزلیقا حورا یاراتمیشام
کفو علیدی حضرت زهرای مرضیه
گور حیدره نه همسر و همتا یاراتمیشام
محشر گونینده امته باب النجاتیدور
خیرالنسانی شافع عقبی یاراتمیشام
باخ عز و جاهه اون بیر امامین آناسیدی
دخت نبی نی ام ابیها یاراتمیشام
اوندان گلر جهانه امام حسن، حسین
اهل بهشتیمه ایکی آقا یاراتمیشام
حسن جمیل خلقت امام حسنده دی
من مجتبانی حُسنی ده زیبا یارتمیشام
اولاد فاطمه ایله والا مقام اولار
زهرانی شأنیده متجلیٰ یاراتمیشام
کرب وبلایه بسلماقا شاه تشنه لب
بیر مادر مقدس و علیا یاراتمیشام
من فطرتاً حسینه تمام خلایقی
خلق ایلینده عاشق شیدا یاراتمیشام
اسرار خلقتیمدی حسین ابن فاطمه
استاد علم، علم الاسما یاراتمیشام
دیل ذکر یاحسین دئماقا خلق اولوب، گوزی
ائتسین رخ حسینه تماشا یاراتمیشام
هر گوز حسینه آغلاماسا کور اولا گرک
عشق حسینله دیده ی بینا یاراتمیشام
دوزدور کی تشنه جان وئره جاقدور حسین، ولی
اوندان اوتور من آب گوارا یاراتمیشام
فتح ایلیر او قله ی عشق و سعادتی
قاف شهادته اونی عنقا یاراتمیشام
عاشور غمده شاه شهیده شریک غم
باشی بلالی زینب کبری یاراتمیشام
سردار اولا حسینیمه صحرای عشقیده
عباس تک دلاور هیجا یاراتمیشام
عباس مرتضانین او غیرتلی اوغلیدور
عباسیده شجاعتی دریا یاراتمیشام
باخسا گوزل جمالینه یوسفده حظ ائدر
دردانه ی علینی دل آرا یاراتمیشام
غبطه ییر فرشته لر اول عبد صالحه
پور علینی مظهر تقوا یاراتمیشام
عباس، باوفادی وار اون یدی منصبی
کرب وبلایه گور نجه سقا یاراتمیشام
عباسی هر مریضی اولان سسله سین گرک
مشگل گشادی، درده مداوا یاراتمیشام
(فرهادیا)شعوریوه شامل دی رحمتیم
شکر ایله گور نه طبعیوی گویا یاراتمیشام
- چهارشنبه
- 12
- آذر
- 1399
- ساعت
- 22:58
- نوشته شده توسط
- یوسف اکبری
ارسال دیدگاه